يتبقي 13 شهراً بالتمام والكمال - إن شاء الله - علي نهاية الفترة الأولي لحكم الرئيس السيسي.. وقبل الهنا بسنة خرج علينا الأيام الماضية شوية مذيعين يتكلمون عن الانتخابات الرئاسية القادمة وهاتك يا فذلكة وطنطنة وكأنه أمر ممنهج ومتفق عليه ويطالبون بدخول مرشحين أمام الرئيس السيسي.. وما أدهشني ليس خروج الكلام ده في يوم واحد ولكن الأسماء التي طرحوها وهم يعلمون أن الشعب لو شاف أحدهم هايضربه مثل أيمن نور وعبدالمنعم أبوالفتوح وغيرهما.. وللأسف يتشدقون بالديمقراطية وأن مصر يجب أن تكون زي فرنسا وأمريكا وهم لا يدركون أنهم يلعبون بالنار ويحاولون فرض أجندات مرعبة ومنهم من لوح بكارت غبي وهو تعديل الدستور وهنا أقول رأيي الشخصي وهو أن الشعب لو عاوز يغير الدستور إللي انضحك علينا بيه هايغيره في 24 ساعة ومحدش يقول زي الأخ المجنون ده إن الشعب هو اللي وافق عليه. وهو عارف كويس إن اللي عملوه وضعوا فيه قنابل وألغاماً وكان بينهم من يكره البلد واستقرارها وحتي الآن.. ولذلك كل واحد يسأل نفسه كده "إيه اللي طلع الكلام عن الانتخابات الرئاسية دلوقت واحنا في مرحلة بناء وتنمية..!!".. واللي هايجنن الناس إنهم عارفين هايختاروا مين وعاوزين مين وبمزاجهم من غير ضغط ولا يحزنون.. واللي يغيظ ما يقال عن عدم إرهاب كل من يريد الترشح للرئاسة.. يا سلام.. شوف اللعب جاي منين.. إرهاب إيه.. ومين اللي هايرهبهم؟.. وبجد اختشوا علي دمكم وريحوا نفسكم.. محدش بقي يقدر يلعب بدماغ ومشاعر الشعب.. عشان "كل شيء انكشفن وبان" علي رأي المرحوم عبدالمنعم مدبولي..!!
متحف.. للإرهابيين
** لو قعدت سنين حضرتك تشرح للجيل الجديد إيه اللي الإخوان الإرهابيين عملوه في البلد مش هايصدق ولا هايقتنع لأن النشء الصاعد كله لازم يصدق لما يشوف بعينه.. وعشان كده سمعت عن دراسة شاملة وافية تدعو إلي إقامة متحف للأعمال الإرهابية مكان مقر الإخوان في المقطم ليتم عرض تاريخهم الأسود المهبب.. والاغتيالات التي ارتكبوها منذ نشأتهم عام 1928 وكمان أهدافهم للوصول إلي الحكم تحت شعار "الإسلام هو الحل".. حتي أن قام الزعيم الراجل الراحل الدكر جمال عبدالناصر بالتخلص منهم بين عشية وضحاها.. ثم عودتهم أيام الرئيس الراحل أنور السادات وتوغلهم في البلد.. ثم تشكيل التنظيم الدولي وصولا إلي ما فعلوه بالبلد بعد يناير وخلال سنة حكمهم السودة الله لا يعيدها.. وبصراحة أعجبتني الفكرة التي سوف تدر دخلا من خلال زيارات المواطنين للمتحف وكمان من السياح والأجانب اللي هايزوروه.. ودلوقت يا تري في حد هايفكر في الموضوع ده وهايشوف الدراسة دي. ونبدأ التنفيذ.. وعلي فكرة المتحف ده مش هايتكلف قرشين صاغ لأن كل أدواته ومستلزماته موجودة وجاهزة من صور.. لأفلام.. لوثائق.. وغيرها.. والآن.. مين هايسمعنا كلمة موافق.. وكلنا وراه..!!
** لا تندهشوا مما يفعله ويقوله المدعو يسري محمد مصطفي فودة .. آسف يسري فودة.. فقد خرج من قريته منشأة جنزور إلي العمل موظفاً بالتليفزيون المصري ثم تم استقطابه عن طريق المجلس الثقافي البريطاني عام 1993 من خلال منحة للحصول علي الدكتوراه من اسكتلندا وهناك بدأ تجنيده من خلال عمله بالإذاعة البريطانية حيث أرسلوه لتغطية حرب البوسنة والهرسك ونجح في شحن العالم ضد البوسنيين ليثبت ولاءه للإنجليز أولياء نعمته.. ولقطته وكالة أسوشيتد برس ولكن بمرتب أقل من (BBC) ولكي يتم رفع مرتبه شارك في تأسيس مكتب قناة "الحقيرة" القطرية بلندن وتم تعيينه نائب المدير التنفيذي وارتبط مع حمد بن جاسم آل خليفة رئيس وزراء ووزير خارجية قطر وقام بتقديم برنامج "سري للغاية" والذي من خلاله سلم رمزي بن شيبة وخالد شيخ محمد "من قيادات تنظيم القاعدة" إلي المخابرات البريطانية تسليم أهالي لتكون مكافأته الحصول علي الجنسية البريطانية كتحصين له.. ومع 25 يناير 2011 جندته المخابرات البريطانية MI6 بالعمل في قناة "أون تي في" وكان صاحبها نجيب ساويرس. وكان مهندس عمية إحراج الفريق أحمد شفيق في البرنامج. ثم عمل كأبرز مسئول استشاري إعلامي لحملة الإرهابي محمد مرسي.. واستضاف شوية عيال وأطفال ليهتفوا يسقط حكم العسكر.. واشتري منزلا في لندن وتم تعيينه مدير تدريب في "(BBC بمرتب شهري 15 ألف جنيه استرليني.. وللأسف عندما تعرض لحادث سيارة وتهشمت عظامه قامت القوات المسلحة المصرية العظيمة بنقله بطائرة إلي المستشفي للعلاج ويا ريتهم كانوا سبوه يموت ويروح في داهية.. وبعد أن سقطت آخر ورقة توت عنه وانكشفت نواياه التجسسية ناحية مصر وشعبها ومشاركته في إشعال وتسخين البلد هرب إلي الخارج حيث يعمل في قناة "دويتش فيللا" الألمانية والتي يبث من خلالها سمومه وقذارته ضد مصر التي ألقت به في مزبلة التاريخ.. ويستضيف من هم علي شاكلته من "القبيضة" الذين باعوا أنفسهم بتراب الفلوس لتخريب مصر.. ومش هايقدروا.. عشان دي مصر.. والآن عرفتوا إيه اللي بيحصل فيكم يا شعب يا محترم.. والصبر مفتاح الفرج..!!
بتاع.. الحريات
** مش عارف إيه لزمة ظهور خالد أبوبكر مرة تانية علي قناة النهار.. يمكن عشان يقولنا إن الحريات في مصر بعافية!!.. ويعني لو كانت بعافية كان طلع علينا ويقول الكلام ده براحته وبدون ما حد ينبهه إن اللي ضيعنا في السبع سنين اللي فاتت هي الحريات!! يا أخي ارحمنا بقي.. وخليك في فرنسا بتاعتك.. ولو جدع تقول كده هناك وشوف الرئيس "ماكرون" هايعمل فيك إيه.. ووحياة أبوك بلاش تفتح علي نفسك فاتحة..!!