< بالله عليكم.. لما وزير محترم فى الحكومة.. يتعهد أمام كل وسائل الإعلام.. بعدم زيادة سعر اللحمة.. فى المجمعات الاستهلاكية.. حتى عيد الأضحى المبارك!!
وبعد أيام قليلة - أقل من أسبوع - يقوم نفس هذا الوزير.. بزيادة سعر كيلو اللحمة خمسة جنيهات.. لتصبح بثمانين جنيها.. بدلا من خمسة وسبعين جنيها..يبقى ده - لا مؤاخذة - وزير.. مالوش كلمة!!
يعنى - جنابك - اما إنك تكون قد الكلام.. اللى انت قولته.. أو بلاش تقوله خالص!!
والسؤال هنا.. هل يمكن أن يكون قرار زيادة.. أسعار اللحوم المستوردة فى المجمعات..قد صدر من سلطات أعلى.. من الوزير نفسه؟!
يعنى جاء لسيادته جاهزا.. وهو بصم عليه عميانى.. من غير ما يقراه!!
حمام.. بالفريك!!
< بصراحة كده.. ومن غير لف أو دوران.. لولا «حماية» الرئيس للمواطن القنائى حمام.. لتحول الغلبان.. الى وجبة «حمام بالفريك» على مائدة مافيا الأراضى..الذين كانوا - للأسف - يجلسون فى الصفوف الأولى.. فى لقاء الرئيس!!
عشانا.. عليك يارب!!
< اذا صح هذا الكلام.. فنحن أمام كارثة حقيقية.. فقد كتب عصام الغرابلى على صفحته على الفيس بوك.. هذا الكلام الخطير قال فيه:
الأسبوع الجاى مصر هتقترض عبر سندات دولية 2 مليار دولار..
موش مهم بفائدة كام ومدة سدادهم كم سنة..
هناخد منهم 750 مليون دولار ندفعهم لشركات النفط الاجنبية من الديون اللى علينا التى تبلغ 3٫5 مليار دولار..
هيتبقى 1٫25 مليار دولار هناخد منهم 750 مليون دولار لنادى باريس وهيتبقى 500 مليون.. ننتظر أما صندوق النقد يتكرم علينا ويدفع بقية الشريحة الأولى اللى هيه 1,25 مليار دولار هيبقى معانا كده 1,75 مليار دولار.. تمام.. استنى ما تستعجلشى تركيا عاوزة وديعتها بكام؟ بمليار دولار يا باشا.. طيب هيتبقى 750 مليون دولار حلوين نزود بيهم الاحتياطى النقدى ونعمل مؤتمر صحافى نهيص فيه بانجاز ارتفاع الاحتياطى.. لا يا سيدى هتحل الدفعة التانية لشركات النفط الأجنبية تقريباً 500 مليون دولار.. طيب الحمد لله هيتبقى 250 مليون دولار ينطح دولار.. طبعا.. بس هنسددهم لـ دول بنستورد منها قمح عشان الرغيف عشان موضوع المليون فدان ونص لسه بعافية شوية!!
هروووب.. حبيب العادلى!!
بما أنه «حبيب العادلى» يعنى اسمه بيقول:
- «الحب».. قبل.. «العدل»!!
< ده الراجل مولود من بطن أمه «مستثنى».. بقى مش عايزينه يهرب.. ازااااى؟!
عريس.. يابووووى!!
< ياعمى.. أنا طالب القرب منك
- بتشتغل إيه.. يابنى
< حرامى
- أهلا وسهلا.. تعالى ادخل فى عبى.. ادخل!!
السرقة.. شيء عادى!!
لو سألتنى عن أخطر شيء.. حدث فى بلدى.. فى السنوات الأخيرة؟!
لقلت لك إن «السرقة».. بقيت شيء عادى خالص.. فلا هى عيب.. وﻻ حرام!!
سوريا والعراق.. من تانى!!
أنا كل خوفى.. يكون «أهل» سوريا والعراق وليبيا.. بيقولوا لبعض:
- مش أحسن ما نبقى.. زى مصر!!
لا يا شيخ.. معقولة دى؟!
< يا ترى.. لو قلت لكم.. إنى - شخصيا - أعرف مسئول «حكومى».. شريف.. ومش حرامى.. وﻻ ضلالى.. هتصدقونى؟!
الغش.. حق مشروع!!
أخطر كلمة.. قالها ابن عمى.. الأستاذ عزالدين محمد حفنى - مدير مدرسة ومربى فاضل - إن التلاميذ وأولياء أمورهم.. باتوا يتعاملون مع الغش فى الامتحانات.. على أنه «حق مشروع»!!
البيه.. الحمار!!
< من عام مضى كتبت الوفد.. فى مانشيت رئيسى.. أنه يوجد فى مصر 5 ملايين «حمار»!!
طب يا جماعة.. كملوا جميلكم.. وقولوا لنا.. كم واحد من جنابهم.. فى مواقع «مهمة» فى مصر؟!