** يا أخي الشعب المصري ده عجيب وفعلا عظيم ومالوش ريموت كونترول.. الناس عمالة تصرخ من ارتفاع الأسعار والغلاء وينتظرون زيادات جديدة.. وتلاقي الأسواق والمحلات زي النحل من الزحمة.. وشوفوا الشوارع عاملة إزاي بعد الفطار.. عرفتم بقي محدش يقدر يذلنا أو يكسرنا ليه.. عشان ده إسمه شعب مصر..!!
** وزير الأوقاف مختار جمعة من بين الوزراء اللي شغالين بجد.. وعشان بحبه بدون مصلحة أو خدمة أعرض عليه الآتي.. وحسب ما تعودنا أن جامع السيدة نفيسة بيتحول إلي مطعم وقهوة وكشك بسكويت وحلويات وفرن أفرنجي كمان لأن الناس بتجيب سندوتشات وشاي وبسكويت وبقسماط وبتوزعه قبل وبعد صلاة الجمعة.. والجمعة اللي فاتت كان د. جمعة بيصلي بينا الجمعة عند ستنا نفيسة ووجدت المسجد زي الفل وبلا عشوائيات وزالت دهشتي عندما علمت أن الجميع عارف بحضور الوزير.. وبعد أن أنهي الصلاة ولم يصل حتي الجنازة غادر من هنا وطلع الأكل من هنا.. يا تري الرسالة وصلت..!!
** وبمناسبة د. مختار جمعة.. أبدت القارئة شهد محمد عبدالعزيز من الحلمية الجديدة بالسيدة زينب إعجابها وتأييدها لقرار منع إذاعة صلاة التراويح والدروس بمكبرات الصوت بالمساجد..!!
** تصوروا أن مجلس الأعمال المصري - الأوروبي يكاد يكون الجهة الخاصة الوحيدة التي تعمل في كل حاجة لصالح البلد عشان رئيسه راجل مصري وطني جدع ابن بلد وفاهم كل حاجة اسمه محمد أبوالعينين.. والنهاردة جايبين سحر نصر - الوزيرة الدءوبة النشيطة - لمناقشة الاستثمارات المباشرة محليا وخارجيا.. بس يا تري هايعزموها علي الفطار.. واللا السحور.. واللا بالنهار..!!
** الله يرحمك يا صفاء حجازي ويحسن إليكي.. ميتة في أيام مفترجة عشان كنت بتعاملي ضميرك وياما قلتيلي "نفسي يا ضياء أنضف ماسبيرو ده من كل الرابش اللي فيه.. وبعدها أطلع معاش".. بجد هانفتقدك قوي يا أجدع ست في ماسبيرو. ويا أجدع صديقة.. ومش هانسي كلمتك "إدعيلي ربنا يقويني وأشيل أكبر ثعبانين بماسبيرو".. ونجحت في طرد الأول.. ومالحقتش تخلص علي الثاني عشان مرضها.. ودعواتي لكي بالمغفرة إن شاء الله..!!
** مازال أكبر ممثل في مصر سنا ومقاما يصمم علي أن يقدم مسلسلات هايفة وتافهة الأربع سنين اللي فاتت عشان المؤلف إياه الأرزقي والحرامي بيضحك عليه وعلي المنتج.. ورزق الهبل علي المجانين..!!
** لأول مرة أشاهد وأسمع إسلام بحيري.. وعندي سؤال "إشمعنا في قناة TEN"!! وبصراحة بعد ما سمعته شوية أؤكد أن مشيخة الأزهر وإمامها غلطانين إنهم رفعوا عليه قضية.. لأنه أصبح بطلا من ورق.. الراجل مابيقولش حاجة مفهومة خالص..!!
** هيفاء وهبي: بقيتي "حرباية" بحق وحقيق مع ممدوح شاهين..!!
** صادق صباح : أنت منتج محترم.. زي مسلسلاتك بالضبط.. "الحصان الأسود" أحمد السقا.. و"الحلال" سمية الخشاب.. و"طاقة القدر" حمادة هلال.. واختياراتك محترمة وصائبة وتحقق الجماهيرية والتوعية.. برافو..!!