رمضان: لو سمحت ياأخ "يونيه" مش انت برضه شهر الإجازات!
يونيه: إجازات إيه يامولانا.. هو فيه حد بيعرف يروح هنا ولا هنا في حضورك ياعم رمضان.
رمضان: ياسيدي أنا باجي مرة من السنة للسنة.
يونيه: وأنا يعني اللي كل يوم قاعد وكابس علي أنفاس العباد؟
رمضان: أرجوك طول بالك شوية ياخواجة يونيه انت تزعل لما أكون شهر القرآن والعبادات.
يونيه: وانت يضايقك لما أكون شهر المصايف.
رمضان: ياسيدي بلبط علي كيفك.. لكن البحر موجود طول السنة لكن شهر الرحمة والمغفرة والعتق من النار.. فرصة عظيمة.
يونيه: وهو أنا لا سمح الله قلت للناس سيبوا المساجد واطلعوا علي الشواطيء والبلاجات!!
رمضان: طبعاً لا.. لكن المناخ العام يفرق كتير.. لما تلاقي الروحانيات هي اللي مسيطرة علي الجو العام غير لما تلاقي طوفان مسلسلات وبرامج ومقالب سخيفة.. وياريتها تسلية بريئة.
يونيه: ياشيخ رمضان أنا شهر من شهور ربنا زيك بالظبط والمسلسلات لها ناسها.. والعبادة لها ناسها.
رمضان: ياسيدي عارف لكن يرضيك اللي بيحصل!
يونيه: بصراحة حاجة تكسف أي شهر وأي بني آدم عنده نخوة.
رمضان: عداك العيب يعني عندي حق أزعل من اللي بيحصل باسمي.
يونيه: والله ما أنا عارف أقولك إيه ياشيخ رمضان.
رمضان: تفتكر مين اللي له مصلحة اني أخلع توب الصلاة والقرآن والتراويح.. والبس توب طوني خليفة ورامز جلال وثعلب الصحراء وكلب البراري وماسورة المسلسلات اللي مغرقة الدنيا.
يونيه: يعني مفيش حاجة عاجباك أبداً يامولانا.
رمضان: وهما لمؤاخذة طول السنة في زهد وعبادة وصيام وييجي عليهم رمضان يشموا نفسهم وينزلوا بأيديهم وأسنانهم علي الأكل والمسلسلات والتسالي في النهار بسامية جمال ونعيمة عاكف وكاريوكا ونجوي.. وفي الليل مسلسلات فيها ألفاظ وشتائم وفواحش وملل واستخفاف.
يونيه: حيلك حيلك اللي مش عاجبه بلاش يفتح التليفزيون.
رمضان: ماشي.. لكن ممكن أسألك سؤالا بشكل أخوي؟
يونيه: تحت أمرك.
رمضان: لأنك بتيجي في الحر يعي بقيت مع يوليو وأغسطس أشهر الإجازات.. مظبوط؟
يونيه: مظبوط لكن فيه ناس بتاخد إجازة في يناير وفبراير.
رمضان: معلوم.. لكن مين اللي خلاني شهر مسلسلات وبرامج غصباً عني!
يونيه: اسأل الجماعة بتوع الفضائيات.
رمضان: قصدك بتوع غسيل الأموال والذي منه؟
يونيه: انت كده بتضرب العاطل في الباطل وبتظلم الغالي علي حساب الرخيص.
رمضان: معاك حق.. لكن دلوقت أنا مش عارف إن كنت رمضان ولا يناير؟
يونيه: وهو يناير فيه صيام؟
رمضان: أيوه فيه صيام عن الأخلاق الحسنة والفضيلة إلا من رحم ربي.
يونيه: اشمعني يناير.
رمضان: وهي بقت تفرق يامستر.. يناير عن فبراير عن أبريل.. ولا رمضان عن شعبان أو عدنان!!