في كل بلاد الدنيا... الناس بتراقب بيوتها بالكاميرات، وتراقب شغلها بالكاميرات، البنوك بتراقب فلوسها بالكاميرات، والدول تراقب حدودها بكاميرات..مكان واحد في العالم لا يراقب بالكاميرات تفتكرو افين ؟؟
المتحف المصري الكبير ..ينفرد ويتميز ويسبق كل متاحف العالم بأنه المتحف العالمي الوحيد اللي مش هانركب في مخازنه كاميرات !! خصوصا إن فيها أقدم وأغلي كنوز العالم التي لا تقدر بثمن !!
هذا الرأي وهذا الفكر »اللوذعي»‬ هو آخر وأحدث أفكار عباقرة وزارة الآثار !!وده ليه بقي ؟
علشان الحراميه ما يعرفوش بالضبط المخازن فيها إيه !! والأمن اللي بيحرس المخازن ما يشوفش مين دخل ولا مين خرج ! ولا مين ممكن لاقدر الله يمد إيده ويسرق !!
ويمكن يكون السبب ( علشان المتحف مش بيعيش له عيال ) أو لأن المتحف محصن بتعويذه ضد السرقة !!
علما بأن مبني البنتاجون الأمريكي ذات نفسه كان مراقب بكاميرات من الخارج ومن الداخل سجلت اعتداءات 11سبتمبر..لكن الظاهر إن عباقرة وزارة الاثار، شايفين إن المتحف المصري الكبير، فيه أسرار مقتنيات أهم من مبني وزارة الدفاع الاميركية!!
ولو ده تفكير خارج الصندوق .. يبقي التفكير المره دي خرج من الصندوق ..واتدحرج علي الأرض.. وبدل مايطير لفوق ..طير العقل والمنطق معاه !!
والحجة إن اللي هايشوف محتويات المخازن خلسة هايسرقها !! ده علي اعتبار إن مافيش أبواب .. ولا حراس واللي قادر يكسر باب متحف ويغافل حراسه مش عارف هايلاقي إيه جواه ؟ و أهو الحرامي لو مالقاش آثار، يمكن يلاقي شنط رمضان أو كحك العيد !! ويبقي طلع بحاجه ولا هايتجرم علي الفاضي؟!! ومن موقعي هذا..أحب أقول لصاحب هذه الفكرة غير المسبوقة ياسلام علي مخك البلالانط يا (بحر العلم).. يا (ترعة المفهومية) لو سألت أي حد في الدنيا مخزن المتحف هايكون فيه إيه ؟ هايرد يقولك ..أكيد مافيش فيه آثار !!