** ولا واحد من الغلابة والفقراء إلا ويقول وايه ذنبه السيسي انه كان واخد البلد خربانة ومفتحة من كل حتة وعرف يوقفها علي رجليها ويلم اشلاءها ويقفل الخروم.. ولو كان ربنا رزقه بحكومة واحدة بتشتغل نص ما هو بيشتغل.. ماكنتش الأسعار والدولار ولعت وماكنش واحد من التجار الجشعين حرك الأسعار مليما واحدا.. وعشان شايفين الريس بعينينا شغال بما يرضي الله وعاوز يصلح الأحوال.. هانستحمل وهانصبر ومش هانضر بلدنا تاني.
يا سلام علي الكلام الزين.. هو ده الشعب الحقيقي اللي بيحب بلده وبيخاف عليها ومعندوش استعداد حد يسخنه تاني ويلعب بدماغه.. مع اني عارف ومتأكد ان الكام ألف اللي انضحك عليهم في 25 يناير 2011 مش همه الشعب.. ولكنني افتكرت امبارح الشعب اللي بجد همه الأربعين مليون اللي نزلوا الشوارع يوم 3 يوليو 2013 ومنحوا الفريق أول عبدالفتاح السيسي تفويضا لمواجهة الإرهاب المحتمل وهمه الشعب اللي طالبوه بقيادة البلد لبر الأمان وماشيين معاه علي الحلوة والمرة عكس الخونة والمرتزقة اللي ما بيظهروش غير في المرة بس واللي محدش فيهم فتح بقه لما الرئيس أقر العلاوات الاستثنائية والغلاء والمعاشات وتكافل وكرامة وبناء المشروعات العملاقة وآلاف الشقق ورصف الطرق.
لما أسعار تزيد يولعوا الدنيا ولما تقول لواحد أو واحدة ليه بتسخن الدنيا يقولك أنا وقفت في 30 يونيو ضد الإخوان.. طيب اللي عمل كده يولع في الدنيا واللا يفهم الناس ان اليورو بعشرين جنيها والدولار 17 جنيها والريال السعودي 5 جنيهات وفي المقابل الجنيه المصري يساوي 5.134 دينار عراقي وشوف العراق فين دلوقتي و170.05 لير لبنانية و5.27 ريال يمني والعشرين رغيفا بالبطاقة ثمنها جنيه والزيت والسكر والأرز ببلاش علي التموين والفرد 50 جنيها وتلف القاهرة بمترو الانفاق وتدفع 2 جنيه تبقي دي بلد فيها جعانين ومش لاقيين ياكلوا.. طيب اعضاء النوادي كام والمصايف بيروحها كام والقهاوي والكافيهات.. والحمد لله معندناش جيش منقسم ولا قواعد عسكرية ولا فتنة طائفية ولا مخيمات للاجئين ترمي لهم الطائرات الأكل والشرب.
في السنة الهباب "2012/2013" مفيش بنزين ولا سولار ولا كهرباء والأهبل الي كان بيقول الواد بتاع الجركن والواد بتاع شد السكينة وياخد عشرين جنيها.. ولكن بعد ثورة 30 يونيه مش محتاجين نقول الحكاية بقت عاملة ازاي.. واللي ما يشوفش من الغربال يبقي أعمي القلب والنظر ورغم ان البلد بلا موارد الا انه يكفي آلاف المساكن والمدارس والمستشفيات وتطوير القري الفقيرة واختفاء مرض فيروس سي.
أنا شخصيا لما بالاقي شوية معاتيه وكدابين زفة بيسخنوا الدنيا اقول لنفسي كان ايه اللي أجبر الرئيس السيسي انه يشيل الهم وكان عليه ده كله بايه.. كان هايفضل وزير دفاع لحد ما يخرج للمعاش ويقضي حياته مستقرا بلا هم وغم ونكد وناس بتفتي في كل حاجة.. لكن أرد وأقول ازاي.. مينفعش يبقي ابن أشرف مؤسسة في الكون القوات المسلحة وبلده يحتاج له وقت شدة ولا يتحمل المسئولية.. والمصريون جابوه بالأمر.. وماضحكش علينا في كلمة.. والشعب الحقيقي وقف معاه لحد دلوقتي ولسه كمان.. واللي يجننك يا أخي اللي يقولك السيسي السبب.. تيجي تقوله طيب نجيب مين غيره.. يقولك مفيش.. طيب ماتخلي عندك دم وتساعده - مش بقول تطبل - لكن تساعده ولو بفكرة.. أو تشوف شغلك.. أو تريحنا وتحط لسانك في بقك!!
كل ما فات جاء علي بالي امبارح 3 يوليو.. وربنا هايحفظ مصر وشعبها ورئيسها وجيشها.
** مرتضي منصور: قلتلك في التليفون ايناسيو مدرب هايل واللاعيبة هي اللي تعبانة ولسة عند كلامي.. اوعي تخسره.. طاوعني!!
** بصراحة.. أحلي وأجمل واجرأ قرار منذ نشأة وزارة الداخلية.. حركة تنقلات أمناء الشرطة وعملية التطهير الواسعة.. اللواء مجدي عبدالغفار.. أنت وزير داخلية زي الكتاب مابيقول.. ربنا معاك.
** أهم قرار في حياة عادل إمام.. ابتعاده عن يوسف معاطي.. الزعيم هايرجع ابن عشرين سنة.. وبكره تشوف!!