كتبت في أول يوم في سنة ٢٠١٧ مقالا اسمه "ظهور المستريح الشيك"، وده من الآخر كده بيتكلم عن الشخص اللي بيلبس طواقي بفلوس الناس ويبالغ في المظاهر، وفي الآخر كام واحد بيكسب من وراه والأغلبية "بتتلدع"..
كان سبب الكتابة إني اتلدعت فقلت أكتب علشان أوعي الناس علشان مايتخدعوش في المظاهر والحركات ويحافظوا على جيوبهم من "المستريحين"، اللي أصبحوا موجودين في كل حتة في مصر، مش بس في الأقاليم زي الأول...
طيب السؤال هو ليه "المستريح الشيك" بيعمل كده؟ وإيه السبب إنه بياكل حقوق الناس وبيدوس عليهم علشان يزود من ثروته؟ وليه بيبالغ في الشكليات بالشكل الملحوظ ده؟
بعد البحث والتفكير اكتشفنا أن أكبر سبب في المبالغة والفشخرة الكدابة وتلبيس الطواقي عادة بيكون "زوجة المستريح الشيك"، طبعا فيه أسباب تانية زي الطمع و"حب السيطرة" وإحساس إنه "جامد"، عشان بيعمل فلوس كتير بمجهود قليل... بس "زوجة المستريح الشيك" عادة بتبقى حدوتة لوحدها..

الست دي عادة بتكون شخصية بتقارن بين "زوجها المستريح" وأزواج صاحباتها وبتقرص عليه وبتخليه يتخلى عن أخلاقه وينهب علشان يرضي طلبات الست الهانم طبعا.
يتميز "المستريح الشيك" بإرضاء رهيب للزوجة... علشان من كتر الدلع ماتركزش إنه "مستريح" أو ممكن تكون واخدة بالها وعاملة عبيطة، الله أعلم... المهم إنها كل دورها في الحياة إنها تحلم و"المستريح" يتصرف ويفاجئها بحاجات ماحدش غيره يعرف يعملها، حتى لو أغنى منه مليون مرة، بس هو فلوسه سهلة فصرفها سهل... عايزة "طيارة" ماشي، عايزة "جزيرة لوحدها" ماشي، عايزة "لبن العصفور" مافيش مشكلة طول ما فيه "أشخاص" بتفضي جيوبها في خزنة "المستريح" الهانم هتفضل تنول اللي بتتمناه، وهيبقى كل مشكلتها في الحياة تختار البلد اللي هتسافرها تتفسح أو هتجيب الشنطة السودة ولا "الحمرا" ولا الاتنين.
الهانم ممكن تطلب "شنطة" بتمن نصيب "شخصين" في محفظة المستريح، ولازم تتجاب على طول، وممكن تطلب "عربية" فيتقال لها "لأ، دي بسيطة أوي أنا هاجيبلك حاجة أحسن".
يتميز المستريح "بالفشخرة"، وكل ما "مستوى "الجيوب" اللي حواليه تزيد ومستوى حياته يعلى "سرعة التقليب" بتزيد، والدلع بيزيد، يعني تقدر تقول "كل ما يستريح أكتر هيستريح أكتر"، لحد ما ضميره يأنبه ودي عادة مش بتحصل غير لما حد "يكهربه" وياخد "شعرة من جلد الخنزير" زي ما قلت في المقال اللي فات.

فالطبيعي بتكون "زوجة المستريح الشيك" من طبقة أقل من اللي هي نفسها تعيش فيها، وده بيسمح لها تتغاضى عن الأساسيات اللي مش موجودة أكيد في "المستريح"، من أجل الشكليات، علشان لو هي من نفس المستوى مش هتعرف تيجي على نفسها وتستحمل "نتورت" الكلام عن "المستريح"، واللي ممكن بخليها تتمسك بيه أكتر إنها تكون بتحاول بقالها سنين توصل لمرحلة معينة وهي مش بتبقى فاهمة إن "الرضا" مش بالفلوس والمظاهر، وإن الحاجات الأساسية البسيطة زي الـ"صراحة" و"القناعة" أهم بكتير من "المجوهرات" و"الفساتين.
المستريح عادة "بيهتم" أوي بجمال "زوجته" ومش بيفرق معاه أوي لو بتتعاكس من رجالة تانية أو كده، المهم "المصلحة" تمشي... ده كمان بعد شوية في بعض الأحيان بتساعده علي صيد "الفريسة الجديدة" أو "زكيبة" فلوس جديدة أو أشخاص ترضى تحط معاه فلوس... وبتستخدم علاقاتها في بعض الأحيان في إنها "تجوز" "الزكايب" لستات تبعها علشان "يخسره" الفلوس وهما ساكتين...
الخلاصة إنك لو عايز تعرف "المستريح الشيك" اقرا المقال اللي فات، ولو هو "صايع أوي" وماهرشتوش المقال ده فرصة تانية لإنك تعرف "وجه المستريح الشيك"، فلو ماركزتش ارجع واقرا تاني.