اللي مشترك في باقة إنترنت مع المصرية للاتصالات بيشوف الويل..لا سرعة ولا انضباط ولا خدمة ولا حتي حد يرد عليك في قسم الشكاوي يساعدك او يجبر خاطرك لأنك عميل بتدفع فلوس..المشكلة ان الشركة الوطنية أصبحت الشركة الرابعة في قطاع خدمات المحمول ومش عارف يا تري هتبقي خدمة المحادثات زي خدمة النت..احنا بلد شاطرة جدا في الإعلانات المضللة يعني الشركة تعمل اعلان وهمي او شبه وهمي وتفهم العميل انها هتقدمله خدمات سرعة وانضباط علي شاشات التليفزيون فقط ولكن الواقع يختلف كثيرا عن المعلن عنه..المفروض ان الحكومة الحالية صاحبة لقب الحكومة الذكية لانها جعلت تعاملات حياتيه كثيرة تتم من خلال المعاملات علي الإنترنيت سواء تجديد رخصة سواقة او حجز تذاكر او حتي شراء ملابس وغيرها من الخدمات.. الغريب ان في اكتر من شركة اتصالات في مصر وهناك منافسة قوية بين جميع الشركات لجذب اكثر عدد من العملاء..ولكن علشان احنا مصريين بنحب نشجع كل حاجة مصري ذهبنا إلي الشركة الوطنية بس كان رد الفعل اننا نحصل علي خدمة سيئة وبعدين تيجي تنقل الاشتراك علي شركة تانية تشوف السواد..وكأن شركات الاتصالات دولة داخل الدولة ولا يوجد رقيب ولا حسيب ولا حتي مكاتب خدمات الشكاوي بتعمل اي حاجة..يعني ممكن تشتكي من سرعة النت يقولك هو انت ساكن في الدور الكام..طب ايه علاقة الدور بسرعة النت..يا ريت لو في حد مسئول عاوز الشركة الوطنية تنجح وتحجز مكان مناسب بين الشركات الاخري يفهم الناس اللي شغالة هناك ان اللي بيشتكي من سوء الخدمة ده مواطن مشترك وبيدفع فلوس وفعلا بيبقي عنده مشكلة مش بيتدلع..وسلملي علي الانترنت فائق السرعة.