الأخبار
هشام مبارك
احم احم ! - نفد صبري من ياسمين صبري!
ياسمين صبري راحت.. ياسمين صبري جات، ياسمين قالت ياسمين عادت، ياسمين نامت ياسمين صحيت من النوم، ياسمين أتجوزت ياسمين اطلقت، شوفت ياسمين النهاردة مع عمرو أديب، هل رأيت كيف ظهرت مع لميس، هل شاركت ولو تليفوينا في منتدي الحوار الذي تم تنظيمه عن أحدث طلة لها؟. اكتب رأيك عن تأثير ياسمين في البيوت المصرية. وهكذا فجأة وجدت مصر كلها تتحدث عن ياسمين صبري فهي تتصدر تقريبا قائمة الهاشتاجات الأكثر متابعة في مصر والعالم العربي كما لا يخلو برنامج تليفزيوني من التنويه عن استضافتها في حلقته المقبلة ناهيك عن أحاديث النميمة علي السوشيال ميديا حيث لا صوت يعلو صوت الكلام عن ياسمين صبري ولا صور تلفت أنظار الشباب والرجال ولا حتي الأطفال سوي صور ياسمين صبري وفساتين ياسمين صبري وفورمة شعر ياسمين صبري وماذا تأكل ياسمين صبري وطلة ياسمين صبري وتأثير ياسمين صبري علي الاقتصاد والبورصة، كل هذا جعلني أسأل نفسي: يا تري بنت مين في مصر ياسمين صبري !
لجأت لأم البنات والتي حصلت مؤخرا علي لقب فريق عملي (زوجتي أو الحكومة سابقا) وسألتها بحسن نية: من هي ياسمين صبري وليتني ما فعلت حيث لم تكتف بعدم الرد ولكنها رمقتني بنظرة كاشفة كاسحة مرعبة أقشعر لها بدني فلم أكرر السؤال وآثرت السلامة لكني لم أستطع مقاومة فضولي ولجأت للبنات فسألتهن همسا: من هي ياسمين صبري فقوبلت بعاصفة من الاستهجان والاستنكار: فيه حد يابابا في مصر النهاردة مايعرفش ياسمين صبري؟ فسألتهن بسذاجة: أيوه يعني بتشتغل إيه؟ فقالت لقاء وهي في حالة نرفزة شديدة: ممثلة يابابا معقولة ماتعرفهاش؟ فلعنت جهلي وعدم متابعتي لأخبار أهل الفن فلابد أن ياسمين فازت بالأوسكار مثلا عن دورها في فيلم جديد أو ربما علي الأقل تم ترشيحها للجائزة التي تتنافس عليها مع كبار نجمات هوليوود فقمت بجولة في المواقع الأخبارية لعلها تأتيني بقبس من أخبار الأوسكار فلم أجد ما يشفي غليلي فعدت للبنات مرة: طب فكروني بأي دور لها فقالت أسرار: ياسيمن يابابا إللي طلعت مع محمد ابن عادل إمام في فيلم »جحيم في الهند»‬ فخبطت رأسي قائلا: أيوه افتكرتها مالها بقي وعملت إيه أفلام تاني، خلي كل الناس بتتكلم عنها، وكل البرامج تستضيفها اليومين دول؟ فقالت وعود: معقولة ماشفتش فساتين ياسمين في الجونة فقلت: معلش ياستي أعذريني مش متابع كويس لحركة الفساتين في الجونة لكن عايز أعرف الفيلم الجديد لياسمين واضح أنه مكسر الدنيا فقالت كلمات آخر عنقود البنات لحين إشعار آخر: فيلم إيه ووجع قلب إيه يابابا مين قال لحضرتك ان ياسمين لازم تعمل فيلم علشان تكسر الدنيا؟ فقلت: وهي دي محتاجة حد يقولهالي؟ فقالت: يابابا حضرتك قديم أوي التمثيل ده آخر حاجة ممكن تخلي الواحدة نجمة، المهم شكلها عامل إزاي، خفة دمها، تسريحة شعرها، لبسها والحاجات دي إللي بتخلي البرامج تجيبها بالساعة والساعتين، يعني من الآخر كده مش مهم قدموا إيه للفن لكن المهم حالتهم إيه مع النيولوك والموضة حتي الناس اللي بتتفرج يابابا مش مستنية تعرف من ياسمين كلام مجعلص عن أزمة السينما والإنتاج وغيرها من أزمات. الناس مكتفية أزمات ومحتاجة حاجة تخليها تغير مود الضنك إللي هي فيه، انتهي كلام كلمات في الوقت الذي رن فيه هاتفي وكان المتصل قريب لي بالصعيد يستغيث: اكتب علي لساني لو الحكومة مشافتش حل لحمي الضنك الصعايدة كلهم حاييجوا يعيشوا في القاهرة، فقلت له: اوعي يا مجنون خليك عندك، حمي الضنك أهون من حمي ياسمين صبري!.
تعليقات
اقرأ ايضا
الصحف