** أقسم بالله قسماً يحاسبني عليه ربنا إن مصر وشعبها ربنا راضي عنهم عشان يولي رجلاً اسمه عبد الفتاح السيسي أمور البلد.. ومش هاتكلم عن اللي عمله وربنا قدره عليه من أول أحداث 25 يناير مروراً بثورة 30 يونية ووصولاً إلي توليه الحكم بتكليف وتفويض من الشعب ثم ماقدمه من جهد وصحة وتفكير وحب لمصر وشعبها.. وأخيراً التوكيلات التي تنهال يومياً لترشيحه مرة ثانية ولكن هاتكلم عن صراحته التامة وهو يتحدث علي مدار ثلاثة أيام في مؤتمر "حكاية وطن".. إيه الشفافية دي..وإيه التلقائية دي.. وإيه الإنسانية دي.. وإيه الوطنية دي.. وإيه.. وإيه . وإيه.. فتح قلبه علي مصراعيه مثلما عهدناه.. ولم يغضب من سؤال ولااستفسار من مواطن وكم كان مبتسماً من قلبه وهو يخاطب مواطناً إسمه إبراهيم ويضحك مداعباً إياه "كده برضه يابو خليل".. ثم تحدث عن أخلاقياته التي تربي عليها كمواطن مصري أصيل وهو يتحدث عن مساعدته لوالدته وأهل بيته ويضرب مثلاً راقياً في الرجولة وبعدها يخاطب اللي بيضايق البنات والسيدات معاتباً إياهم بكل جدية.. وكم كانت قمة الحسم والحزم وهو يقول محذراً "والله ماهسلم البلد لواحد حرامي أو فاسد يقعد علي الكرسي ده.. دي مصر مش أي حاجة.. ده ربنا يحاسبني لو عملت كده" ثم يضيف بكل إرتياح "لكن الناس الأفاضل اللي يرشحوا نفسهم.. ربنا يوفقهم".. ووجدت نفسي وانا أشاهد الرئيس المواطن الإنسان عبد الفتاح السيسي أهمس "ده مش مؤتمر "حكاية وطن" وبس.. ده مؤتمر حكاية راجل صريح".. وأعتقد أن أي مرشح رئاسي آخر شاف المؤتمر ده هايحترم نفسه ومش هايقدر يقول كلمة عن الرئيس السيسي لأن الناس هاتقول عليه حاجات مش كويسه وكل شئ باين ومعروف للجميع . وأهلاً بالإنتخابات الشريفة.. وعن نفسي أقولها بكل فخر "يشرفني ان يكون الرئيس السيسي قائداً لمصر وزعيماً لشعبها اللي بيحبه وبيموت فيه وبيفوضه إلي أن يشاء الله.. وربنا يدينا العمر وهايكون فيه كلام تاني في مقام آخر لما نرشحه مرة تالتة ورابعة وخامسة وخميسة إن شاء الل".. وتحيا مصر.
** ياتري حد فهم كلام الرئيس السيسي عندما أجاب عن سؤال خاص بماسيبرو.. وحياة ربنا سؤالي برئ ومن غير علامة تعجب.
** بمناسبة ماسبق .. أقول بكل وضوح إن الناس إرتاحت الفترة اللي فاتت بعد غياب بعض المذيعين اللي كانوا بيولعوا الدنيا وبيسخنوا النفوس ولكن الناس ضربتهم علي "........." وتم طردهم من قنواتهم والجو بقي نضيف والهوا بقي نقي.. وإذا بقناة تعيد أبو حمالات مرة تانية مع إن فيها اللي مكفيها زي يوسف الحسيني وغيره.. وإذا بقناة أخري تعيد "محموق أفندي" بعد خروجه للمعاش بثلاثة سنوات.. مع وجود "حريقة بيه" في قناة ثالثة.. يانهار مدوحس.. مين اللي رجع الناس دي ومع إقتراب الإنتخابات الرئاسية.. واللي رجعهم ده بيطلع لسانه لمين.. للبلد واللا للشعب واللا لمين.. حرام عليكم البلد مش ناقصة .. وإشمعني "دي إم سي" و"صدي البلد" مفيهاش الأشكال دي.. وده رأيي الخاص جدا وأنا مستعد لتلقي أي رد من أي حد يفهمنا إيه اللي بيحصل ده ولمصلحة مين.. ده إذا حد بيرد أصلاً..!!!!
** تلقيت أربع مكالمات من أربعة مخرجين كل منهم يظن أنه المخرج النصاب اللي كتبت عنه الأسبوع الماضي ده غير الممثلين والممثلات والمؤلفين.. وبصراحة قلت لنفسي فعلاً كل واحد بيحس بنفسه.. وعجايب..!!
** بسم الله ماشاء الله من يوم هاني شاكر مامسك نقابة الموسيقيين والدنيا هادية ورايقه وكمان معاشاتهم زادت اللهم لاحسد.. طول عمرك أمير ياهاني.
** حلاوة الأهلي إنه بيحرق دم وأعصاب مشجعيه زي ماحصل قدام المقاصة وبعدين يفرحهم.. طب ماكان من أول الماتش.. وآزارو خطير رغم أنه كتير بيلعب برجليه مش بمخه.
** بصوا.. مهما يعمل مرتضي منصور مفيش غيره ينفع يقود الزمالك.. واللي يعرف كلامي ده الزملكاوية القدام العاقلين.. "وبكره تشوفوا إيهاب جلال هايعمل إيه".. إمضاء أهلاوي.
** نايل سبورت.. مني عبد الكريم وسماح عمار.