مش مهم نقول اونكتب تحيا مصر، لكن المهم نقول عملنا ايه عشان نحافظ علي ابنائها ؟ الاغاني والمشاهد المؤثرة لا تبني اوطانا، الأوطان تبني بالعمل، ‎المقال ده موجه للمواطن وللدولة، ولنا جميعا ‎الكام سنة اللي فاتت بقي عندنا ظاهرة ان جاز تسميتها بالتعبير عن حب الوطن '
‎جميل ورائع كل منا يعبر بطريقته عن حبه لوطنه، وهذه الظاهرة تزداد في بعض المواقف زي مثلا عندما نتعرض لمحنة اويستشهد احد من ابنائنا وايضا عندما تكون هناك مباراة للفريق القومي لكرة القدم تبدأ تلاقي مظاهر علي مواقع التواصل الاجتماعي واعلام وكلمات مؤثرة
‎ومن الدولة كمان تلاقي اغاني وافلام ودموع وتاثر وحاجات كده من اللي بتاكل مع الناس ‎طيب.... قعدنا نقول بلادي بلادي لك حبي وفؤادي لحد الصبح، وعيطنا شوية وهللنا بالاعلام ورسمنا علي وشوش ولادنا واتصورنا معاهم وهما شايلين العلم ونزلنا الصورة وجابت الف لايك، وحضرنا الحفلة اللي عملاها الدولة اللي جيبين فيها المطرب اياه يغني عشان مصر وقلنا لاصحابنا ان الدعوة بتاعت الحفلة جايه عشان احنا ناس مهمين ومافيش اهم مننا وان وقت الحفلة كانت مصر كلها موجودة ورقصنا وغنينا وروحنا علي بيوتنا
‎وبعدين !!!!!! ‎اقولك ياسيدي : لوعيطت عشان استشهد اخوك في الوطن اللي بيدافع عنك ده حقك وهوحق مقدر ومفهوم، لكن اللي مش مفهوم انك لا تتاثر اطلاقا الا لساعات وحتي تاثرك ده لا بيودي ولا بيجيب وقت مصلحة البلد، لان لوضابط استشهد انت مع ضابط اخر واقف في الشارع بتعمل مشكلة اوبتحاول ترشيه، اوحتي وقت اي حادثة بتكتب علي تويتر وفيس بوك اخبار وكانك العالم ببواطن الامور ولا تعلم مدي تاثير هذه الاخبار التي غالبا تكون غير صحيحة ‎انت بتفتح قنوات تلفزيونية معادية لبلدك وبتاخد كلام من اللي بيقولوه وتنشره علي موقعك ‎انت بتساعد في نقل معلومة غلط وبتهد تعب ولادك اللي بيشتغلوا عشان يحموا ارواح ابنائك ‎انا طبعا مش هادخل في موضوع تعبير واكلمك عن انك بنيت من غير ترخيص وقدمت كام رشوة النهاردة واستخدمت محسوبياتك كام مرة والكلام الفاضي ده،، ابدا المهم انك بعد ما عملت كل ده برضه كتبت علي تويتر تحيا مصر ‎ومش هاقولك روحت شغلك في سعادة ولا لا وخليت حد وقع مكانك لما كنت غايب ولا ظبط المدير بتاعك اخر مرة امتي، ولا وقفت حال كام حد من اللي بيتعاملوا مع المصلحة اللي انت بتشتغل فيها ولازوغت كام مرة ‎مش هاقولك كل ده المهم تشتري علم يوم ماتش مصر وتاخذ حماده ابنك وتنزل تقول تحيا مصر ‎ده المواطن.
‎اما الدولة فهو هو نفس البيان وهيا هيا نفس الكلمات ومستعد اقولك الحادثة الجاية كل واحد هايقول ايه، ويسبوك لايص في عرض معلومة وقت الازمة، ويسيبوا الاشاعة تطلع وتنتشر وبعدين يكذبوها، ولاعمر واحد طلع في يوم قال اخطأنا في اشياء وجاري العمل علي مراجعة الخطأ وهذه هي خطة العمل القادمة،، ابدا !! المهم الاغاني وتحيا مصر.
‎طيب سايبين المواطن للاعلاميين ومش طايقين الاعلاميين وبتلبسوهم انهم سبب المشاكل، ما تدلعوا المتحدثين باسم الدولة عشان يكلموا الناس ويشرحوا لهم بالارقام والحقائق ‎بلاش لوالشرح المفصل مش مطلوب في بعض الاوقات اوالخوض في بعض القضايا يضر لماذا لا تحاولون ايصال هذا الكلام للناس حتي يساعدون في تنفيذه ‎ولا حاجة المهم سمعني احلي اغنية وطنية علي القناه الاولي.
‎وسيبك من كل ده تشوف بقي مظاهر زي مين استقبل مين ازاي ومين كان قوي في مؤتمر صحفي ومين افحم مين وشفت الحرس كان عامل ازاي، وولا وعملوها الرجالة واي كلام فارغ نخلق منه موضوعات ندعي فيها اننا انتصرنا في شئ، والمهم اللقطة ‎وبالليل علي الساعة ٦ تفتح التلفزيون تلاقينا متابعين المذيعين بتوعنا العظام الابطال اللي بيشتموا البلاد اللي بتعادينا وكل ما كانت الشتيمة اكثر سخونة كل ما عدد الليكات والشير زاد وكل ما ادارة المحطة انبسطت من المذيع وهاتجدد له بكام مليون زيادة والجمهور طبعا مبسوط اخر انبساط من الشتيمة وهاتوا طبل وزمر وسمعني تسلم الايادي !!!
‎والله حرام،، بحق كل الاديان حرام
‎عمركم شوفتوا بلد في العالم اتقدمت بالاغاني ؟ اوبالشتيمة، اوبرفع الاعلام والطبل والزمر ؟ اوبالبيانات اللي من سكت لن تثنينا والجودة ؟ عمركم شفتم اي بناء في العالم يتم تشييده لان اصحابه يصلون ويدعون الله ويؤدون الزكاة ؟؟
‎يا اخونا بناء الاوطان يحتاج الي كلمة واحدة وهي ' العمل ' ‎كل اللي الهيصة الزايدة اللي احنا بقينا فيها اليومين دول لا تبني اوطان، المهم العمل ‎الدموع والتاثر والشجب والادانة والتاييد المطلق كل هذه امور لا تتساوي مع العمل ‎جلد الذات والبكاء علي الماضي والحديث من اجل ابراز اسماء معينة هذه امور لا تحذم الا اصحابها ولا علاقة لها بالوطن فالوطن لا يحتاج الا العمل.
‎اهمال الناس وحجب المعلومات عنهم ومحاولة اظهار ان الظروف لا تسمح كلها امور تخلق حالة من اللخبطة المجتمعية في ظل مجتمع لا يطلب الا العمل.
‎مصر مش بتاعت حد ولا ملك حد مصر هي قطعة ارض حدودها البحر المتوسط والاحمر وليبيا والسودان عاش فيها المصريون القدامي وصنعوا مجدا يحكون عنه في كتب التاريخ، وتركوا قطعة الارض هذه لاهلها كي يعمروها اكثر ويزيدوها حضاره ‎لكن لا اعادة قراءة التاريخ ولا التباهي به ستؤدي الي ازدهار الوطن ولا الاكتفاء بالتاريخ يبقي علي التاريخ ذاته لان الامم تصنع تاريخها ايضا بالعمل ‎مصر دولة هامة ومحورية، كلمة بنسمعها بس لازم نفهم حجم الاهمية ولازم نقرأ متغيرات المجتمعات العربية والافريقية ومن اصبح ايضا مهما ومحوريا بجوارنا ‎ولازم نفهم انه لاصداقة بين الدول لكن هناك مصالح بين الدول، ومش مهم الرؤساء ضحكوا ازاي وهما بيسلموا علي بعض المهم قدموا ايه لبلدنا.
‎خلونا نفكر بجدية كفاية دوشة وكلام فاضي ملوش علاقة بالتقييم الواقعي علي الارض لحال بلدنا خلينا ننظر بمفهوم اوسع للعالم من حولنا، خلونا نقول المواطن خطوات ان فعلها يخدم بلده اكثر من الاغاني، خلونا نقول للدولة خدوا المواطن معاكم ولا تتركوه فريسة لغيركم ‎مصر لن تحيا الا اذا كان هناك عمل.. كفاية اغاني