الجمهورية
ضياء دندش
الله عليك.. يامحمد مين مايحبش صلاح
* الله الله عليك يا "محمد ياصلاح".. هكذا صرخت بأعلي صوتي منتصف مساء أول أمس واستيقظ أهل البيت والجيران وأنا أسمع مذيع حفل رابطة اللاعبين المحترفين ببريطانيا العظمي يعلن فوز ابن بلدي وصاحب السعادة وباعث الفخر والبهجة في نفوس المصريين بجائزة أحسن لاعب في إنجلترا.. تخيلوا كل لاعبي إنجلترا يعطون أصواتهم لابن النيل الأسمر صاحب أجمل دقن وأحلي إبتسامة وصاحب التواضع الكبير.. حاجة تشرف وتسعد وتجعلنا نفتخر إن إحنا مصريين بلديات محمد صلاح.. وزي مابنشوفه في الملعب حريف وسريع وموتور ربنا يحفظه شوفوه وهو بيتكلم إنجليزي.. إيه الحلاوة والجمال ده مشروع قومي بحق وحقيقي.. وكله كوم والصبي الإنجليزي المصاب بمرض جلدي لما قال "نفسي أسلم علي محمد صلاح" وإختاره من دون لاعيبة انجلترا كلها..والأجمل إنه سمع كلام مدربه "يورجن جلوب" لما قاله "تجيب الجايزة وتيجي عشان عندنا ماتش روما الثلاثاء "اليوم" وبعد الحفلة سمع صلاح كلام مدربه وفص ملح وداب علي بيتهم علي طول.. وشوفوا الضيوف اللي بيتكلموا عليه بعد الحفلة ومنهم اللي قال إنه يتمني أن يكون إنجليزياً..!!.. وياسلاااام بقي يابوصلاح لو تغلبوا روما النهاردة وبعدها تاخدوا كاس أوروبا يبقي إيه الهنا والنعيم ده.. إنجلترا هاتفرق شربات.
وبصراحة كان نفسي أشوف الكاتب إياه اللي مش عاجباه دقن صلاح ونفسي أشوفه ممكن يكتب إيه علي " مو".. ودايماً هافتخر بإسم محمد صلاح عشان ده إسم أخويا وكمان إسم صلاح عشان ده إسم أبويا الله يرحمه اللي كان بيحب الكورة زي عينيه وأهلاوي رهييييب.. وعندي سؤال بسيط "مين مايحبش صلاح".. أفتكر مفيش.. وكل الناس بتموت فيه وبتدعيله "ربنا يحفظك يابني ويزيدك من فضله كمان وكمان "..آمين.
ولما نشوف محمدصلاح واللي بيعمله للبلد عامة وقريته خاصة..أتجنن من اللي سايبين مذيعين بتسخن وتولع وبتهيج في الناس.. زي وائل الأبراشي وحركاته ومحمود سعد ولدغاته وعمرو أديب ومراته وإبراهيم عيسي وحمالاته وصلاح دياب وشيكولاتاته..واللي كمان بيعملوا أغنيات وبيقولوا أشعار ضد البلد وقيادتها.. واللي هايقولي حرية رأي وتعبير وإبداع وبدنجان هاضربه علي قفاه.. وياأيها المسئولون عن تواجد الأشرار دول..ياإما تفهمونا سايبينهم ليه أو تحسوا بالبلد وبالناس شوية وتنضفوا الفضائيات.. دي مصر بلدنا اللي عاوزين يكعبلوها وماتستاهلش اللي بيحصل فيها ده وهي ماشيه زي الصاروخ.. ياريت حد يحس علي دمه ويتحرك ويريحنا..!!
تعليقات
اقرأ ايضا
الصحف