انتقلت إلي رحمة الله الدراما المصرية يوم الخميس 17 مايو 2018 الموافق أول رمضان 1439 هجرية .. ويستمر عرض الجنازة بدون عزاء علي أربعة من القنوات الفضائية في مشهد حزين لمدة ثلاثين يوماً.. وهو أمر محير ومدهش ومثير للتساؤلات خاصة أن كحكة إنتاج المسلسلات الرمضانية يتم تقسيمها بين شركتين تنتجان 70% لوحدهما وشركة واحدة غير مصرية تنتج عملين أو ثلاثة وهذا تعريض جديد لظاهرة الاحتكار.. والله يرحم الخواجة ماسبيرو وشقيقتيه صوت القاهرة ومدينة الإنتاج كانوا ينتجون نصف عدد المسلسلات علي الفوازير وشوية برامج.. كل اللي فات ده كوم والمصيبة التانية كوم وهي المسلسلات نفسها تأليفاً وإخراجا وتمثيلا.. وشعرت من أول لحظة أن حكاية الاختيار دي مش فارقة وكلام في الهوا من الممثلين والممثلات اللهم إلا القليل إللي حظه حلو وجاله ورق جديد.. مسلسلات أبطالها تعرضوا للظلم ودخلوا السجن وخرجوا لينتقموا ممن سجنوهم.. ومسلسلات أبطالها بيحلموا بحاجات وبتتحقق بعد فترة ومسلسلات عن مكافحة الإرهاب.. ومسلسلات اشتغلت علي الحالات النفسية.. وأخري عن الصعيد والثأر.. وتشعر وكأن شخصاً واحداً قام بتأليف هذه المسلسلات وطبعاً مازال الأخ محمد رمضان يقلد الراحل العظيم أحمد زكي بل بيزود العيار حبتين في التقليد ولذلك أهنئه علي فشله المستمر وانصحه بالعودة إلي أدوار البلطجة حتي لا يخسر جمهوره لأنه مش لايق خالص في دور غير السنج والجنازير ويسيب دور ضابط الشرطة والشخصيات المحترمة لواحد زي أمير كرارة أو أحمد وفيق أو كريم فهمي.. أو يرحمنا ويبطل تمثيل وحلال عليه النص مليار جنيه اللي عمله في سنتين والقصر والعربيات .. أما كارثة الكوارث اسمها علي ربيع.. قمة التفاهة والهيافة والتقليد الأعمي الفاشل شكلاً ومضموناً للفنان محمد سعد في اللمبي وبوحة وما يدهش الناس المتخصصة وغيرهم إزاي العبقري وائل إحسان يخرج حاجة زي دي.. هي الفلوس تعمل كده.. وإزاي صادق الصباح يوافق علي المساس باسمه في السوق وتصوروا ناس زي صلاح عبدالله وسلوي خطاب وصبري فواز وهنا الزاهد بيقفوا يتفرجوا علي بلياتشو واقف قدامهم وبيضحكوا.. أما الكارثة المستمرة معانا من سنتين فهو أتقل دم في الدنيا اللي ربنا ابتلانا بثقل ظله في المسلسلات والبرامج والأفلام والإعلانات وبينزل من الحنفيات كمان بيومي فؤاد .. يا ساااااااتر .. ماشفتش حد طايقه لكن حظوظ.. واللا إيمان السيد.. مش ممكن المنتجين والمخرجين اللي بيشغلوهم يكون ليهم في الشغلانة.. نروح بقي للحاجات الحلوة القليلة زي عادل إمام في "عوالم خفية " بعد ما اتعالج من يوسف معاطي.. ويحيي الفخراني في "بالحجم العائلي" وأحمد عز في " أبو عمر المصري" وياسر جلال ومحمد رياض في"رحيم" وغادة عبد الرازق في "ضد مجهول" وزينة وفتحي عبد الوهاب وصفوة في "ممنوع الاقتراب".. وهناك من يتحدثون عنها نورا كشك صاحبة شركة خدمات إنتاجية ساهمت في نجاح مسلسلات الفخراني ويسرا وكرارة وهاني سلامة وغادة عبدالرازق.. وربنا يسامحني ويستر علي صيامي.. واللهم إني صايم.