- منى: إيه الرسايل العجيبة اللى باعتها دى يا صيام؟.. (وهى تقرأ الرسائل): «حملة المليون استغفار».. «هنستغفر ربنا جماعة بنية شفاء كل مريض سرطان».. «هتخسر إيه لو صليت ع النبى».

- صيام (وهو يمسك بالموبايل ويكتب رسالة): خدى دى كمان: «لو قصير وعاوز تطول.. أو تخين وعاوز ترفع.. قول أستغفر الله».. وخدى دى كمان: «لو نفسك تتجوز على مراتك.. أو عاوز تخلص من حماتك.. قول حسبى الله ونعم الوكيل».

- منى: يا نهار أسود.. تتجوز على مراتك؟!.

- صيام (ضاحكاً): بشجّع الناس تذكر ربنا.. خلاص نعمل إديت للرسالة «فيه حاجة حلوة هتحصل لك النهارده.. بس بشرط واحد.. قول لا إله إلا الله».. وخدى الجديدة دى «بتشتكى م الفقر وقلة الرزق.. مديرك تاعبك.. أبوك منكد عليك.. مراتك مسودة عيشتك.. قول الله أكبر ولا حول ولا قوة إلا بالله كل مشاكلك تتحل».

- منى: ما عندكش علاج لواحدة ربنا بلاها بجوز افتراضى؟!.

- عم صيام: طبعاً عندى.. تقول «ويخلق ما لا تعلمون».

- منى: مفيش فايدة!.

- عم صيام: فكرة.. اسمعى دى: «الفايدة مش فى البنوك.. الفايدة فى سورة الواقعة.. تجلب الرزق.. وتصونك م الفقر».

- منى (بضجر): حاسة إن عمرى هيبقى قصير.. مش عارفة ليه؟.

- عم صيام (وهو يكتب): آدى الدوا.. «حتى لو قرايبك ما يتساهلوش.. انت تستاهل العمر الطويل.. صلة الرحم تزيد العمر».

- منى: أنا داخلة جوه!.

- عم صيام: انتى اديتينى دوا الضغط إمبارح؟.

- منى: أيوه!.

- عم صيام: مش عارف.. حاسس إنك نسيتى تديهولى.

- منى: مدياك دوا الضغط ودوا السكر.. بقول لك إيه.. فيه خبر على موقع «ع الطاير» بيقول إن فوايد البنوك هتزيد م الشهر الجاى!.

- عم صيام (بلهفة): متأكدة؟.. ثانية واحدة أسرّش عليه!.

- منى: سرّش براحتك.. أنا داخلة أنام.

- عم صيام: 1% بس؟!.. همّا بيقطعوا من جلدهم؟.. حكومة ملهوفة ع الدنيا.. جتهم القرف!.. يا منى.. يا منى!.

- منى: فيه إيه تانى؟!.

- عم صيام: تخيلى الزيادة كام؟.

- منى: قريتها.. 1%.. كويس!.

- عم صيام: همّا مش حاسين بالتضخم اللى احنا فيه.. مش شايفين البهدلة اللى فيها الجنيه.. الفلوس بتخس كل يوم قد كده.. (يسمع رنة رسالة على الموبايل يقرأ): «الفايدة مش فى بنوك الدنيا.. الفايدة فى سورة الواقعة.. تجلب الرزق.. وتصونك م الفقر».. (ينظر إلى منى بغيظ): انتى باعتة لى رسالة؟!.

- منى (ساخرة): بنصحك!.

- عم صيام: ها.. إن شاء الله أقرا سورة الواقعة قبل المغرب.. أنا بكلمك فى موضوع تانى!.

- منى: اقراها دلوقتى وإن شاء الله تجلب لك الرزق وتصونك م الفقر.. وسيبنى أنام شوية.

- عم صيام (بيأس): نامى.. أنا كمان محتاج أريح شوية!.

- منى: صحيح إحنا هنعزم إخواتك إمتى؟!.

- عم صيام: أكلمها عن التضخم والغلا.. والجنيه اللى بيكش.. تقول لى هتعزم إخواتك إمتى؟.. هقول لك بكرة لو عشنا وكان لينا عمر.

- منى (ساخرة): العمر الطويل ليك!.

- عم صيام: بقول لك يا منى.. ما تعرفيش علاج لواحد ربنا بلاه بزوجة افتراضية؟!.