- عم صيام: منه لله الواد رمضان.. هو السبب فى اللى حصل.

- منى: احمد ربنا إن العجل ما وقعش فوق حد.. كان جاب لك مصيبة.

- عم صيام: وهو الشعب الواطى رحم.. أقول لهم لسه فيه الروح نلحقه بالسكينة.. يقولوا لى لأ دا مات.. ويطلع لى عيل باجس.. يقول لى هيبقى إرور كبير قوى لو كلتم لحمة العجل دا.. دا متردى.. وربنا حرم أكل «المتردية».. أقول له النية أساس العمل يضحك عليّا.

- منى (ضاحكة): مش فاهمة!.

- عم صيام: العجل ما كانش فى نيته الانتحار.. دا خاف م السكينة لما شافها فى إيدى.. جرى مننا.. ولاجل الحظ خبط فى السور الخايب اللى فى السطوح.. خده ونزل.. يعنى ما كانش عايز ينتحر ولا حاجة.

- منى: انت بتتكلم عنه كأنه بنى آدم.

- عم صيام: على فكرة انتى بقيتى باجس قوى.

- منى: إيه باجس دى؟.

- عم صيام: Bugs.. ما تعرفيهاش؟.. طبعاً تعرفى إيه عن الكمبيوتر وبرامج الكمبيوتر.. البلد بقت مليانة باجس.. عيل فلحوص يفكس أى شغلانة بلسانه ولا بعينه اللى يندب فيها شعاع ليزر.

- منى: إزاى يعنى؟.

- عم صيام: العين فلقت الحجر يا منى.. ما تستهتريش بالحسد.. الواد رمضان منه لله باصص لى فى كل حاجة.. عينه الوحشة هى اللى بوظت السبوبة.

- منى: مفيش حاجة اسمها حسد.

- عم صيام: انتى هتكفرى؟!.. الحسد مذكور فى القرآن.

- منى: الحسد اللى اتكلم عنه القرآن معناه إن الواحد يجرى فى أذية غيره.. مش موضوع بصة عين.

- صيام: انتى ما تعرفيش عين رمضان.. جواها إشعاع ذرى يفلق الحجر.. واد مدمر.. وبعدين انتى هتفتى فى الدين؟.. انتى ناسية إن سيدنا يعقوب قال لأولاده وهمه داخلين مصر يدخلوا من أبواب متفرقة.. تفتكرى ليه؟!.. أكيد عشان الحسد.

- منى: أنا سمعت الشيخ الشعراوى بيقول إن يعقوب قال بعدها «وما أغنى عنكم من الله من شىء».. يعنى كل حاجة بإيد ربنا.. مش فى العيون ولا فى الرموش.

- صيام: أنا ما أبيعش دماغى.. رمضان عيل واطى.. حقودى.. عينيه تفلق الحجر.. مش هتفلق عجل؟!.. منه لله خسرنى اللحم والعضم والجلد والسقط.

- منى: زكّى عن مالك يا صيام.. عشان ربنا يبارك لك فيه.. اتعلم حاجة من أخويا هشام.. شوف بيعمل خير قد إيه.. اللى فى إيده مش ليه.

- عم صيام (متهكماً): أخوكى يا هانم شغال فى بنك.. والفلوس نازلة عليه زى المطرة.. انتى هتجيبى موظف فى وزارة الزراعة لواحد شغال فى بنك.. ناس عندها الفلوس بالكوم.. وناس تانية ما لهاش غير الأرض والبهايم.

- منى: انت ما تعرفش بيتعب فى شغله قد إيه؟.. ومع ذلك انت بتكسب أكتر منه.

- عم صيام: لأ هو بيكسب أكتر.. كل شوية مكافآت وحوافز.. وقروض.. وشقق.. وعلاج على حساب البنك.. دا بيصرف هو ومراته وعياله الدوا عمال على بطال.. اللى زى أخوكى دا عايش عشان يلهف وخلاص.

- منى: انت بتحسد أخويا يا صيام؟!.. «ومن شر حاسد إذا حسد».

- عم صيام: أيوه بحسده.. عيل باجس صحيح.