- ابن وقته: يعنى إيه مصروف البيت محتاج دعم؟.. انت فاكرانى قاعد على بير بترول!.

- منى: انت مش حاسس بالغلا اللى إحنا فيه.. كل حاجة سعرها اضرب فى اتنين وفى تلاتة.. الأكل والشرب والمواصلات وأسعار الأدوية ومصاريف المدارس.. كل حاجة زادت.

- ابن وقته: طبيعى يا منى.. العقل بيقول كل حاجة لازم تتباع بسعرها.. والمواطن يرشّد استهلاكه.. مش أول ما يحس بزيادة فى الأسعار يصرخ ويقول ادعمونى.. شعب واطى صحيح.

- منى (بعصبية): انت مش حاسس بحاجة.. يرشد إيه.. الناس بتموت!.. الناس كده مش هيلاقوا ياكلوا.

- ابن وقته: حلو.. الحكومة بتساعدكم عَ الريجيم.. هتبقوا أكثر رشاقة.

- منى: ولا هيلبسوا!.

- ابن وقته: رائع.. هيقعدوا بلابيص فى الحر ده.. ولا هيحتاجوا مراوح ولا تكييفات.. وفواتير الكهربة هتقل.

- منى: ولا هيلاقوا تمن دوا يتعالجوا بيه.

- ابن وقته: مدهش.. أجسامهم هتتعود ع المقاومة الطبيعية.

- منى: ولا هيدخلوا مدارس.

- ابن وقته: فانتاستيك.. هيتعلموا بنفسيهم صح.. انتو مش بتشتكوا م المدارس!.

- منى: ولا هيتجوزا.. ولا يخلفوا.

- ابن وقته: جميل.. وهو الجواز أَمَلة، ولّا العيال نافعة فى حاجة.

- منى (بعصبية): يعنى إيه؟!.

- ابن وقته: يعنى هنرجع للحالة الطبيعية اللى اتولدنا عليها.. بلابيص!.. هو ده اللى هيصلح حال الشعب الواطى ده.

- منى: انت مش حاسس بالناس!.

- ابن وقته (ضاحكاً): كان عندى زمان حساسية وخفيت منها.. صدقينى يا منى الصح إن كل مواطن يصرّف نفسه.

- منى (ساخرة): يعنى يعمل زيك!.

- ابن وقته (بغضب): تقصدى إيه؟!.

- منى: تقدر تقول لى البدلة اللى انت لابسها دى جايبها منين؟.

- ابن وقته: ما انتى عارفة أخويا جابها لى هدية.

- منى: والبدل اللى فى الدولاب؟!.

- ابن وقته: هو اللى جايبهم.. عادى.. أخويا وبيهادينى.. إيه المشكلة فى كده؟.

- منى: انت عندك فلوس كتير ومش محتاج.. وبعدين انت عمرك هاديته بحاجة؟!.

- ابن وقته (ضاحكاً): أنا اللى باقبض بالجنيه أهاديه.. ده راجل شغال فى الخليج وبيقبض بالدولار.. أروح فيه فين؟!.

- منى: والعربية؟!.

- ابن وقته (بانزعاج): إوعى يكون حصل فيها حاجة.. أكيد الواد طارق ركبها وخبطها؟!

- منى: العربية سليمة وراكنة تحت.. بس تقدر تقول لى ليه مابتروحش بيها شغلك؟!.

- ابن وقته: ما انتى عارفة.. عزت بيمر علىّ وباركب معاه لحد الشغل.

- منى: وهو مطالب بكده؟.

- ابن وقته: طبعاً.. أنا رئيسه فى الشغل ولازم يجاملنى.. وبعدين ما انتى عارفة أول ما أترقى وكيل وزارة هيبقى تحت رجلى عربية بسواق.

- منى: والدوا بتجيبه م الجامع.. حتى الزيت والسكر والرز بتجيبه م الجامع.

- ابن وقته: لأ مش الجامع بس.. انتى ناسية بطاقة التموين؟.

- منى: فيه ناس ماتقدرش تعمل اللى انت بتعمله ده.

- ابن وقته: واطيين.. ومش عارفين يصرّفوا نفسهم.. الدولة بتقول للمواطن اتصرف بس بعيد عنى.

- منى: فيه ناس ماتعرفش تعمل اللى انت بتعمله.. ولو اتصرفوا بطريقتهم البلد هتخرب.

- ابن وقته: يبقى يعيشوا بلابيص.. عيش بلبوص تموت مستور!.