- ابن وقته: لعيبة فشار.. ومدرب مكرونة!.. ولعلمك اللى ضيع الدنيا الوفد اللى مالوش ملامح اللى راح ليلة الماتش مع روسيا.. حد يقول كده؟! طبل وزمر.. ومش عارف الفنانة مين والممثلة مين.. والإعلامى مين.. غراب البين وأم قويق همه اللى خربوا الدنيا.. ربنا يوقف نموهم.

- عزت: دلوقتى؟!.. ما انت كنت من يومين بتقول كلام غير كده.. مش دول الوطنيين الحقيقيين؟!

- ابن وقته (بلهجة خطيب على منبر): إننى من مكانى هذا أطالب بفتح تحقيق يوضح للمصريين الفلوس اللى اتصرفت ع الناس دى مين اللى سمح بيها.. دا مال يتامى يا عالم.. حرام كده.

- عزت (ضاحكاً): مال يتامى؟!

- ابن وقته: أيوه.. إحنا شعب يتيم.. إزاى يستحلوا مالنا فى الهلس ده؟!

- عزت: يا رااااااااجل.. بذمتك يا ابن وقته.. لو كان المنتخب فاز كنت هتسمّعنى الكلام دا؟.

- ابن وقته: طبعاً.. كنت هقول......

- عزت (مقاطعاً): أنا أقول لك.. كنت هتغنى «عاش».. (بصوت عبدالحليم فى أغنية عاش): عاش اللى سفّر وفدنا للمونديال.. عاش اللى حوّل ماتشنا حرب ونضال.. عاش اللى قال يا مصر.. مفيش محال.. عاش ليكى نجمك.. عاش اللى حبك.. عمل انتصارك.. فرّح عيالك.. أحلى عيال همه عيالك.

- ابن وقته: انت اتجننت يا عزت.. إيه اللى انت بتهبّله دا.. انت بتلحّن لى أغنية.. نسيت إنى رئيسك فى الشغل؟!

- عزت (ضاحكاً): فوق راسى يا ريس.. بس وحياة غاليينك يا شيخ عندى سؤال تانى: تفتكر لو حصلت المعجزة وكنا غلبنا روسيا.. وبعدها السعودية.. وطلعنا للدور التانى.. تفتكر كان هيحصل فينا إيه؟

- ابن وقته: تقصد إيه؟!

- عزت: أقول لك.. كنا هنتقطع من فرقة تانية.. وبدل 3 اخرام هيبقوا 5.. ويمكن أكتر.. هو دا مستوانا.. ولازم نعترف بيه.

- ابن وقته: يا عزت إحنا عندنا شوية لعيبة حلوين.. مشكلتهم فى المدرب.

- عزت: مش كوبر دا اللى كنت بتقول فيه قصايد لما دخلنا كاس العالم.. ولما كنت بقول لك دا بياخد دولارات أد كده، كنت بتقول لى حقه.. بطلوا نفسنة ع الأغنيا.

- ابن وقته: دا سعره العالمى.. وإحنا لازم ندفع عشان نفلح.

- عزت (ضاحكاً): وأدينا فلحنا على إيديه.. يا راجل.. يفضوها سيرة بقى م المدرب الأجنبى ويجيبو مدرب من ولاد البلد وخلصنا.. جايز يفلح معاهم.

- ابن وقته: ولو ما فلحش!

- عزت: ضربوا الأعور على عينه.. كده بايظة وكده بايظة.. على الأقل ما نرميش الدولارات ع الأرض.

- ابن وقته: شوف أديك اتفقت معايا.. أنا زيك كده خايف على فلوس الشعب اليتيم دا.. عشان كده أنا مش هرتاح إلا لما يعملوا تحقيق مع الشركة اللى سفّرت المخنشرين والمخنشرات.. والطبنشات والكبنشات.. اللى عملوا فى فندق فريقنا حفلة الزار.. اللى خلت العيال مضروبة على دماغها بالصورة دى.. دا أنا الدمعة فرّت من عينى لما الجون التانى دخل من بين رجلين الشناوى.. من بين رجليه!

- عزت: ولو كان صدها!

- ابن وقته: كنت هقول عليه برج الجزيرة.

- عزت: مش بقول لك.. كل ساعة بكلام يا ابوالكلامين.

- ابن وقته: أنا ابن وقتى.. اسمى «ابن وقته»!.