كعادته.. جاء صديقي المعترض والمنتقد دائما. متجهما عبوسا.. تبدو عليه علامات التعب وعدم النوم.. وكنا في كل مرة نجتمع فيها نختلف علي قرارات الحكومة واجراءاتها.. وعلي ضرورات الاصلاح وتوقيتاته.. كان رافضا ومنتقدا لكل قرار ولأي إجراء تتخذه الحكومة.. وكنت - بحكم ارتباطي بالشأن الاقتصادي منذ 28 عاما- احاول ان اوضح له وجهة نظر كل الخبراء الاقتصاديين المصريين والاجانب - بضرورة الاصلاح وتصحيح الاوضاع الخاطئة التي استمرت عقودا طويلة وعلاج الأمراض المزمنة التي انهكت جسد الدولة وأهمية تعاطي الدواء بانتظام حتي ولو كان مرا مؤلما . پ
سألته : مالك.. شكلك تعبان ومتضايق.. ياتري ايه اللي مزعلك المرة دي؟
أجاب بحدة : هيكون مين يعني.. الحكومة طبعا .
* هي لسه الحكومة الجديدة عملت حاجة؟ دي لسه مااشتغلتش ولا اتخذت اي قرارات. حتي زيادة اسعار البنزين والبوتاجاز والسولار كان اخر قرار لحكومة المهندس شريف اسماعيل وتم تطبيقه في اول ايام حكومة الدكتور مصطفي مدبولي !
* انا مش قصدي حكومة مدبولي ولا حكومة شريف اسماعيل. أنا أقصد الحكومة اللي في البيت .
* اه تقصد مراتك؟.. مالها عملتلك ايه؟ انا اعرف انك أسد ومسيطر علي الامور كويس !
* فعلا.. بس المرة دي اول مرة تغلبني ويطلع عندها حق. وعشان كده نازلة تريقة وتأنيب فيا. وهو ده اللي مضايقني .
* فهمني ايه اللي حصل؟
* ياسيدي. حنفية الحمام كانت بايظة وبتنقط بقالها فترة طويلة. وكل يوم يزيد التنقيط. ومراتيپتقولي صلحها قبل الدنيا ماتغرق. وانا اقولها حاضر واطنش. او اقولها مفيش فلوس. اواتحجج واقولها عشان اصلحها لازم اقطع المياه لمدة ساعتين علي الاقل. واحنا مش ممكن نتحمل قطع المياه ولا دقيقة .
* وبعدين يافالح؟
* من أسبوع قلت افرحها.. وحجزتلها مصيف في جمصة. وعلي غير عادتها. فوجئت بها بتقولي نصلح الحنفية الاول وبعدين نروح نصيف.. لكني اصرت وألحيت اننا نروح المصيف أولا وبعدين نبقي نفكر في الحنفية پ.. وطبعا كلامي انا اللي مشي .
* مش باقولك أسد ومسيطر !
* يارتني كنت نعامة وفار وسمعت كلامها .
* ليه؟ ايه اللي حصل ياسبع البرومبة؟
* رجعنا لقينا الحنفية اتكسرت. وماسورة المياه انفجرت. والشقة غرقت. والعفش كله باظ. والكهربا ضربت. والدنيا كلها اتلخبطت. وطبعا من ساعتها. مراتي نازلة فيا تأنيب وتوبيخ وتقولي مش قلت لك تصليح الحنفية اهم من المصيف؟
* يعني ياناصح.. بدل ماكنت هتصلح الحنفية بخمسين او مائة جنيه. اصبحت محتاج كذا الف لتصليح الحمام پوتصليح الكهرباء. وكذا الف لشراء عفش جديد. وبدل ماكنت تتحمل قطع المياه لعدة ساعات. هتتضطر تتحمل ايام من غير مياه ونور لحد ماتصلح الماسورة والحنفية والكهرباء. وهتنام علي الارض لحد ماتجيب عفش جديد. طبعا ده غير انك مش هتقدر ترفع عينك تاني في عين مراتك.. وكلمتها هي اللي هتمشي من النهاردة .
* للاسف كل اللي قلته صح.. الا ان الكلمة هتفضل كلمتي. انا لسه أسد ومسيطر .
نظرت اليه بخبث شديد وحاولت استغلال الموقف واقناعه باهمية قرارات الاصلاح الاقتصادي التي تم اتخذها. فقلت :
* ماحدث معك هو نفس مايحدث في الاقتصاد.. وحنفيتك المكسورة تشبه الموازنة اللي فضلت مخرومة سنين طويلة بسبب الدعم وفوائد الديون والخلل الموجود في الجهاز الاداري للدولة .
نظر الي بغضب. وقالي تاني هتقولي الدعم والعجز ولازم نصبر ونتحمل؟
فجأة رن هاتفه المحمول.. نظر في رقم الطالب ودب الرعب في عينه وقام مفزوعا وقال انا لازم ارجع البيت فورا.. دي الحكومة.. قصدي مراتي بتطلبني !!