- ابن وقته: وانتوا فالحين فى إيه علشان تفلحوا فى الكورة.

- منى: خلاص بقى اللى حصل حصل.. ماتش وخسرناه.. الدنيا ما اتهدتش!.

- طارق: نطلع من كاس العالم بصفر.. لعيبة كسر ومدرب على ما تفرج.

- ابن وقته (ساخراً): بس إن شاء الله هناخد جايزة اللعب النضيف.

- طارق (متعجباً): إيه جايزة اللعب النضيف دى؟.

- ابن وقته: إحنا مش دخلنا كاس العالم وطلعنا من غير ولا نقطة.. زى ما بتقول طلعنا بصفر.. يبقى إحنا أنضف فريق فى المونديال.. جيبنا أنضف م الصينى.

- طارق: مش فاهم!.

- منى: أبوك بيتريق يا طارق.

- ابن وقته (ضاحكاً): لا باتريق ولا حاجة.. أنا باقاوم الطاقة السلبية بتاعتكم.. اتعلموا تبصوا للنص المليان فى الكوباية.

- طارق (غاضباً): إحنا صفر فى كل حاجة!.

- ابن وقته: غلط.. ماتتقالش كده.. نقول إحنا نضاف فى كل حاجة.. واخدين جايزة اللعب النضيف فى كل حاجة.. الموظف يروح الشغل.. ومايعملش حاجة.. مانقولش عليه «صفر».. نقول موظف «نضيف».. من حقه جايزة اللعب النضيف.. عيل بيروح المدرسة.. بيخرج منها زى ما دخل.. كاس اللعب النضيف.. علشان جاب صفر.. علينا ديون.. وعجز فى الموازنة.. يعنى صفر.. بردو نستحق جايزة اللعب النضيف.. انت يا واد يا طارق.. فاكر حاجة من منهج الثانوية العامة اللى لسه ممتحن فيه؟.

- طارق: أنا فاكر اسمى!.

- منى (ساخرة): مخه نضيف زى أبوه.

- ابن وقته: شفتى.. أديكى قلتيها بعضمة لسانك.. مخه أنضف م الصينى.. مافيهوش معلومة توحد ربنا.. يعنى صفر.. يبقى يستاهل جايزة اللعب النضيف.. طول عمرنا بنلعب على جايزة اللعب النضيف وبنفوز بيها!.

- طارق: فى حاجة اسمها كده.. يعنى نطلع بصفر وتقول لى اللعب النضيف.

- ابن وقته: اسمع يا طارق، سواق التاكسى اللى مايصفرش العداد أول ما الزبون يركب تقول عليه إيه؟!.

- طارق: حرامى!.

- ابن وقته: شفت.. ده مايستحقش كاس اللعب النضيف.

- منى: ارحمنى يا رب!.

- ابن وقته: دوّرى عَ الصفر تكسبى دنيا وآخرة.

- منى: انت بتبرر الفشل!.

- ابن وقته: أبداً.. أنا باعقلكم وأهديكم بس.. أصل هتتشالوا وتتهبدوا.. وبردو مالكمش غير الصفر فى الآخر.. الصفر قدركم يا منى.. خليكى مؤمنة!.

- طارق: كل الدنيا بتحط علينا.. حاجة تجنن.. لازم يشيلوا اتحاد الكورة ويجيبوا مدرب تانى ولعيبة بجد.. ونشتغل على نضيف.

- ابن وقته: بردو مفيش غير الصفر!.

- منى (غاضبة): عمّال تقول الطاقة السلبية.. وانت أكتر واحد بتدينا طاقة سلبية!.

- ابن وقته: أنا هاثبت لك بالدليل العملى.. اسمع يا واد يا طارق.. انت مش ليك عيل صاحبك بيلعب فى الأهلى؟!.

- طارق: أيوه.. أدهم!.

- ابن وقته: بينام الساعة كام؟!.

- طارق: ينام إيه.. ده سهير ليالى.

- ابن وقته (ضاحكاً): بيشرب اللبن قبل ما ينام؟.

- طارق: ما بيطيقش ريحته!.

- ابن وقته: وأخبار المزز معاه إيه؟!.

- طارق (ضاحكاً): إوعى.. مظبط دنيته عَ الآخر.

- ابن وقته (ضاحكاً): أبشر.. يبقى هياخد كاس اللعب النضيف!.