الخروج عن الصمت

صحيح الدنيا دي حظوظ فيها اللي بيتولد وفي بقه ملعقة دهب، وفيها الشقيان ليله كنهاره ونهاره كليله ويوم لما ربنا يكرمه يدوب بضحكة وتكون من القلب يسمعها أهل الحظ ويقولوا عليه محظوظ. طب اقول لمين وانا اللي اتولدت في بلاد عيب فيها يبقي للراجل دموع، صحيح البكا بيريح لكن موصوف للحريم، ولد يعني راجل إن كان أبوك موجود ولا مش موجود، لازم عليك تتصرف كيف الرجال حتي ولو قتلوك، طيب شوروا علي يا أهل المشورة الفقر عاضض فينا واللي عاملي فيها بيه يدوب كم قراقيط والعمدة راح والعمدة جه وهو بياكل المش زيه زي الجاتوه، وأهل المال عايزين تعرفوا بيشتغلوا ايه مفيش حاجة ممنوعة ما بيشتغلوش فيها، طيب اضحي واروح حداهم وابقي من رجالتهم ويوم ما تقع الفاس في الراس يمين ثلاثة امي تقولي بتعاير بيك كالحريم. واللي ربنا عطاه وعايش في القاهرة ولا الاسكندرية به متصيت يمكن يكون معالي الباشا ولا ولا... بس كل اللي بيعمله بيشتري أرض وعايز الكل فيها عبيد. عمر ما حد فكر يبني فيها مصانع يتلم فيها أهل المهن واللي ضايع. مفيش فايدة هتدلي مصر أو الاسكندرية ولد فلان من الشقا جمع عمارتين ويادوب داخل علي التالتة. ليه مشقاش وانا شايف نفسي لحمة وسط كوم لحم وابويا الأجري مريض ويادوب مكفيهم عيش. ندر علي يا بلد يوم لما ارجع لخلي الكل يقول ولد عوضين اهو أبو الفوارس جامع أهله وناسه والكل بيقول برافو عليك يا محمدين. لكن قليل البخت يعضه الكلب في المولد شقيت كثير ومفيش وأخيرا أهل الفتوي قالوا نشتغل في التهريب. وقعت الفاس في الراس ومفيش حد هيسمي عليك ولا هيقولك يابني ظروفك ايه، واحنا يا ولداه يوم لما بنمسك الجنيه بنعمله عيد.