* " واحد .. اثنين ... الزمالك فين " كان عنوان الألتراس فى مباراة الزمالك والصفاقسى قبل بدايتها وبغض النظر عن السقطة والفضيحة التى حصلت فى ملعب الطيب المهيرى بصفاقس أحب أجاوب الأول على سؤال الألتراس الزمالك رايح فين الزمالك بمناسبة أنهم عاوزين يعرفوا الزمالك رايح فين .. نقول الزمالك خد الدورى بعد أن كانوا بيخافوا يمشوا فى الشوارع وبيخافوا يقولوا انهم زملكاوية .. الزمالك وصل للدور قبل النهائى للكونفيدرالية لأول مرة من عشر سنين .. الزمالك وصل لنصف نهائى بطولة كأس مصر والأقرب للوصول للنهائى والفوز بالبطولة وسيلعب على السوبر المحلى والأقرب للعب على نهائى الكونفيدرالية والسوبر الأفريقى .
وقبل دا كله ودا كله منشآت النادى لا أجمل ولا أروع ولا أعظم طفرة انشائية بكل المقاييس فى أقل من عام عايزين ايه تانى وقبل غلق الملف مستحيل دول يكونوا زملكاوية مستحيل دول يكونوا بيحبوا النادى اللى بيعمل كده ويخرب ويولع قبل الماتش ويشتم اللعيبة ويهاجم باسم مرسى هداف الفريق ب 18 جول والشناوى وجبر وطلبة اللى جابوا ليهم الدورى بعد 11 عاما عيب وألف عيب .
** الزمالك دلوقتى بيضم فرقة بطولة كل اضافات السنة دى أقوى من الموسم اللى فات ، فى كهربا وحمودى ومكى ومحمد سالم وغيرهم نجوم مميزون .. مباراة الصفاقسى أثبتت أن الزمالك فرقة تقيلة وأن صفقاته ولا أروع ومن الوزن الثقيل وقادرة على تغيير نتيجة المباراة فى أى لحظة وهى دى فرق البطولات .. أتصور أن الزمالك يحتاج الى مهاجم أفريقى سوبر وهيأتى فى يناير ان شاء الله لكن الزمالك حاليا فرقة بطولة بمعنى الكلمة .
** فيريرا مدرب عالمى بمعنى الكلمة فعلا مدرب داهية من خلال قعدتى معه خلال كواليس مباراة الصفاقسى أثبتت أنه مدرب عالمى مركز حياته كلها 24 فى ال 24 ساعة كورة راجع بعد مباراة الصفاقسى أتفرج على المباراة وقبل المباراة كان بيتفرج ومعه اللاب بتاعه بيتفرج ويتابع كل حاجة بنفسه بجد استمرار فيريرا مكسب كبير للنادى واضافة قوية جدا وأتصور الأجيال دى كلها هتعمل حاجة مع الزمالك فى ظل وجود فيريرا .
** ميزة أحمد مرتضى كرئيس بعثة تحس أنه واحد منهم مش واحد مننا واحد من الشباب بيتعامل مع اللاعبين بأنهم اخواته نفس الجيل نفس الفكر قريب جدا منهم وغير دا كله وشه حلو فى المغرب الفريق كسب والمرة الثانية فى تونس والفرقة كسبت أتصور أن أحمد كادر مهم للزمالك وكل رحلة بيزداد خبرة أكثر وأكثر .
وعقبال ما يسافر فى النهائى ويرجع بالكأس ان شاء الله مبروك لأحمد مرتضى ومبروك لكل الزمالك .
**أيمن طاهر يستحق كل التحية من مباراة لأخرى يثبت أنه يعمل لمنتخب مصر من خلال تجهيز حارس مرمى على أعلى مستوى بدليل عودة أحمد الشناوى للتألق بتقديم مباراة مميزة أمام الصفاقسى والتفوق على نفسه وأعتقد أن مشاركة جنش كان لها تأثير ايجابى ودافع قوى للشناوى للحفاظ على مركزه بالتألق والاجادة بدليل أنه قبل المباراة بلحظات لم يكن أحد يعلم الحارس الأساسى مرة أخرى كل التحية للكابتن أيمن طاهر .
** الناس كلها شاغلة نفسها الزمالك يقابل الأهلى فى النهائى أو قبل النهائى وأنا كلمت مستر فيريرا فى الموضوع دا قال بجد مش فارق معى كده كده هنتقابل الأسئلة دى بتضغط نفسيا على اللاعبين وعلى فكرة الأهلى والزمالك هيتقبلا فى النهائى وفى السوبر فى كأس مصر كثرة الأسئلة بتشغل ضغط على اللاعبين وهى اللى بتخلق العقدة أتمنى الموضوع دا يتقفل زى ما يتقابلوا فى النهائى أو قبل النهائى وأؤكد ليكوا بجد الزمالك هيفوز بالبطولة وهيكسب الأهلى فى المباراة الجاية ان شاء الله .
** الاستقبال التونسى لبعثة الزمالك لا أروع وتم تذليل كل العقبات لا أزمة ولا مشكلة واحدة وروح فى غاية الود والاحترام من التوانسة للزمالك وبشهادة الجميع استقبال الصفاقسى أفضل استقبال للزمالك فى بطولة الكونفيدرالية ودا مش غريب على الأشقاء عمار يا عرب .