عقد مجلس برلمان المصطبة جلسته السنوية حول لحمة أضحية الحاج عرفة أبوزيد وكان الحضور كلهم من أحفاد المرحوم محمود أبوزيد من صبيان وبنات.
الرئيس: عاوزين نقرأ الفاتحة علي أرواح أهالينا اللي توفوا في الأراضي المقدسة ويا بختهم، وفاتحة تانية علي أرواح أهالينا وأحبابنا وأهل قرية روينة فردا فردا وهي القرية اللي أخرجت عددا كبيرا من المتعلمين ومنهم الفلاح الفصيح عثمان محمود أبوزيد.
صاحب العزومة: عاوزين كل واحد فينا يقول طلباته ويتمني انها تتحقق في حياته.
العضو الفلفوس: طول عمرنا ولما طلعنا علي وش الدنيا نسمع كلام يقول مصر بلد زراعي ومع ذلك بنستورد قمح ونستورد درة وبنستورد فول مدمس وبنستورد حاجات يامة من إنتاج زراعي وأنا أسأل لغاية فين حانفضل نستورد لقمة العيش؟!
العضو النمرود: يا جماعة كلام زميلنا طول عمرنا بنسمعه ومفيش حد عاوز يحل الحكاية دي لأن فيه ناس من مصلحتها الاستيراد من بلاد برة حتي ميّة الشرب بتستوردوها للباشوات.
العضو زعيط: والله أنا شايف الحكومة المرة دي ماشية جد في حكاية استصلاح مليون ونص مليون فدان وده يعتبر بداية كويسة وربنا يوفقهم ونعيش ونشوف الخير اللي جاي.
العضو معيط: أنا مش مصدق إن اللحمة اللي بناكلها مستوردة من آخر الدنيا الي بيقولوا برازيلي وده والله عار علي بلدنا وكفاية لغاية كده واعملوا مزارع لتربية المواشي والغنم ومزارع فراخ ومزارع سمك علشان الناس تشبع وكفاية فقر وقلة حيلة.
العضو نطاط الحيط: انتم ناسيين حاجة مهمة خالص وهي ليه احنا مانزرعش شاي وبن ودخان فالأرض عندنا زي الأرض عندهم وميّة الري زي ميّتهم وكفاية بقة نستورد حاجات الكيف ونزرعها ونصدرها كمان وكفاية كسل.
العضو بهلول: والنبي بلاش أحلام وتعالوا نتفرج في برامج التليفزيون اللي كل بيمثلوا ويطلعوا يتكلموا كلهم لابسين نص قميص يعني كل مفيش حاجة مش باينة ويظهر انهم مش من بلدنا مصر اللي كل ستاتها حشمة لكن ياخسارة ومنهم لله اللي بيسمحوا لهم يطلعوا في قنواتهم.
الرئيس: كل سنة واحنا وبلدنا مصر بخير.