أخذت تكلم نفسها بصوت عال غير عابئة بمن حولها من البشر والسيارات... وبدت السيدة الأربعينية وكأنما تهذي في جدال أشبه بخناقة بينها وبين ذاتها وهي تقول.. ما بقتش مجنونة لوحدها... أتاريه ساكت وما بينطقش...!! هيقول إيه ويعيد إيه..!! ما هو الجنان طال الكل...!!

‎واحنا اللي كنا نضحك لما البياع يقول مجنونة يا "قوطة" ونقول آه أصل الطماطم دي بغزالة مرة بجنيه ومرة بعشرة جنيه، دلوقتي هينادي يقول إيه.. ولا إيه !! الخيار بـ 8 جنيهات والفلفل الرومي بـ 9جنيهات والكوسة بـ 8 والبامية لما رخصت بقت بـ10جنيهات والفلفل الملون اللي العيال بتحبه الكيلو بـ 25جنيها!!! الجنان طال الكل... هنقول ايه بس يا ربي مجنونة يا قوطة ولا مخبول يا فلفل. ولا بتهزر يا خيار ولا بتتقمعي علينا يا بامية...!! يعني لا هناكل لحمة ولا فراخ ولا حتي خضار!! نعمل إيه بس يا ربي وناكل إيه ونعيش إزاي؟

‎اللي عنده عيلين تلاتة عاوزين ياكلوا ويشربوا ويلبسوا ويروحوا مدارس، والمدارس مصاريف ولبس وساندوتشات ودروس خصوصية..!! واﻷكل نار والعيشة مرار... والكهربا غليت والفواتير ولعت، جايين ومتشطرين ع الغلابة وسايبين اللي بيقبضوا ألوفات مؤلفة، ويقولك أصلهم وضع خاص.. وضع خاص.. وضع خاص!!

‎والباشوات بتوع الحكومة يقولولك عدالة اجتماعية، وكل يوم يعملوا قواعد للأجور ويستثنوا منهم ناس ويحطوا سقف للرواتب والدخول ويهدوه علي دماغنا!!!

‎طب ياربي أومال الناس الغلابة يبقوا إيه..!!.

‎الضرايب بياخدوها مننا ويعفوا أصحاب الملايين ويطلعوهم خسرانين !!

‎والأراضي يدوهالهم بملاليم الفدان والغلابة يقولولهم المتر بألوفات.. ولما ييجي وقت الجد ولاد الكبار بيطلع معاهم جنسية تانية يسافروا بيها بره البلد، وولادنا إحنا يدخلوا الجيش علشان يدافعوا عن بلدهم! وفي الآخر مستخسرين فينا حتي الخضار ناكله أو نشتريه!!

‎واستكملت السيدة خناقتها مع نفسها.. وقد بدأت دموعها تنهمر بغزارة... قائلة:

‎طب يارب نشكي لمين.. للريس؟ هو هيعمل إيه ولا إيه وهيسمع مين ولا مين..! بس إحنا برضه هنعمل ايه ماهو اللي اختار المسئولين بتوعه وهو اللي وافق علي الوزرا اللي راحوا واللي جم... وهو اللي سايبهم يبيعوا ويشتروا فينا.. وكل واحد فيهم كل همه إنه يطلع نفسه "ميه ميه" ولو قالوله "بم "يطلع يقوللهم "علي قلبكم ضربة الدم"،

‎وأهم قاعدين علي قلبنا ،واللي فلح فيهم يقولك أنا عملت منظومة العيش ووفرت اﻷنابيب وكفاية عليا كده!! تيجي تقوله بس اللحمة والسكر والخضار نار.. تلاقي التاني يرد يقولك اﻷسعار مناسبة جدا...بس المرتبات هي اللي واقعة!! وفي الآخر إحنا اللي مالناش أصحاب....نعمل إيه ونعيش إزاي....!! خلاص ياخدوا مرتباتنا مش عاوزينها ويعيشونا هم بقي، وتورينا الحكومة هاتجيب لنا منين مش عاوزين ناكل لحمة ولا فراخ.. نسيناهم ونسيونا تأكلنا بس الخضار اللي مابقيناش قادرين علي تمنه. تعبنا يارب ومالناش غيرك... يا ترحمنا.. يا تاخد الحكومة.

‎لا تعليق.....