عبارة ¢مش بتوع كورة¢ كانت غريبة جدا وصادمة لما سمعتها من نائب رئيس النادي الأهلي أحمد سعيد بعد الخسارة من أورلاندو. بعد ما وصف حاله هو ورئيس الأهلي محمود طاهر أنهما مش بتوع كورة طيب انتو بتوع إيه فهمونا طيب سندوتشات ولا فول وطعمية ولا بتوع إيه؟.
ولما نائب رئيس الأهلي ورئيس النادي عارفين أنهم مش بتوع كورة تدخلوا فيها من الأول ليه ومحمود طاهر أصبح الحاكم بأمره في فريق الكرة وهو صاحب كل الإختيارات في الجهاز الفني واللاعبين وأمور الفريق .. لماذا لم يتم منعه من التدخل لأنه مش بتاع كورة وكان سبها من الأول لبتوع الكرة.
يا مجلس الأهلي .. إدارات الكرة الناجحة في العالم من ناس مش بتوع كورة ولكن عندهم حساسية الكرة .. والنادي الأهلي مثل الزمالك بتاع كورة والجمهور المصري بتاع كورة يعني لما أنتو عارفين أنكم مش بتوع كورة اتنازلوا عن رئاسة الكرة لمن له فيها وبطلوا كلام مستفز ومالوش لازمه.
مش بتوع كورة تنطبق أيضا علي الألتراس لأنه بيشجع علشان أهدافه وأكبر دليل أنهم مش بتوع كورة ما حدث في مباراة الأهلي عندما رفضوا حضور مباراة أورلاندو لأن ¢البنر¢ الخاص بهم اتسحب منهم لو إنت عايز تشجع فريقك شجع في أي ظروف مش علشان هدفه الخاص.
وده اللي يتقال لباسم مرسي لاعب الزمالك أن المتغطي بالألتراس عريان وأنت رايح في سكه اللي يروح ما يرجعش والنهارده أنت بتدافع عن ناس مش بتوع كورة علشان مصلحتك مش علشان نادي الزمالك لأنك لو بتدافع عن الزمالك كنت دافعت عن حضور الجماهير بدون تمييز. وأعتقد أنك لو قابلت مجموعة جماهير عادية مش ألتراس هتتاعمل معاهم عادي لكن لو ألتراس هتروح لحد عندهم وتعتذر بعد ما يشتموك .. كده ياباسم إنت مش بتاع كورة وبتاع منظرة ومع الموجة.. وده طريق الانهيار.