‎ده كتير..كتير كده والله علي أعصاب المصريين!!

‎إثيوبيا أعلنت عن اعتزامها إنشاء سد النهضة علي أراضيها لتخزين مياه النيل...المصريون ماكدبوش خبر..قلقوا بصراحة..وأعلنوا اعتراضهم وامتعاضهم..إثيوبيا ماسألتش.!! المصريون بصوا من تحت لفوق وقالوا للأثيوبيين إخص عليكم يا وحشين ! ‎المصريون افتكروا إثيوبيا بتهوش...إثيوبيا عملت مناقصة واشتغلت في السد بجد. المصريون استهزأوا بإثيوبيا وقالوا..احنا أصحاب 7000سنة حضارة وهنقطعكوا !!

‎الإثيوبيون..ردوا علي المصريين وقالولهم خليهم"8000سنة" واحنا بقي ولاد النهاردة وهنوريكم. !!

‎المصريون..ولا همهم ،وهات يا هري ونكت في نفسهم ،وهات يا تصريحات عنترية

‎إثيوبيا.. ما سألتش في المصريين وقالت إنهم فنجرية بق، وعملت تحالفات وتربيطات مع إسرائيل وتركيا والصين علشان تمول السد.

‎المصريون..لقوا الحكاية جد ،وأخيرا بطلوا ضحك واتخضوا.

‎المصريون..أقالوا وزير الري ،وجابوا وزير جديد اسمه (المغازي ).

‎إثيوبيا.. قالت للمصريين انتوا زعلانين ليه ؟ تعالوا نتفاوض ونتفاهم واحنا هنريحكوا خالص.

‎المصريون..بلعوا الطعم وفضلوا رايحين يتفاوضوا.. راجعين يتفاوضوا، "ورقصني يا جدع ".فات كتير؟ فاتت سنة ،والتانية...!!

‎الإثيوبيون...بيبنوا في السد والتمويلات نازلة عليهم زي المطرة.

‎المصريون.. اشتكوا للأمم المتحدة ،التمويلات وقفت واتجمدت ،والسد بقي سمع هس ،ولا طوبة اتحركت من مكانها !!

‎إثيوبيا..جريت عالمصريين قالتلهم شبيك لبيك تطلبوا إيه ؟ المصريون قالوا ندخل معاكم في تمويل السد ونشترك في الإدارة !!

‎الإثيوبيون..قالوا أحب ما علي قلبنا ،بس ده مخالف لدستور بلدنا والمركب اللي ليها ريسيين بتغرق. بس تعالوا نتفاوض !!

‎المصريون..صدقواوراحوا المفاوضات

‎العالم كله ضرب كف علي كف وقالوا يظهر إن ‎الإثيوبيين سحروا المصريين وشربوهم حاجة أصفره!!

‎المصريون.. وقعوا للإثيوبيين بالموافقه علي إنشاء السد!! وإثيوبيا أخدت الورقة وطلعت للمصريين لسانها، وهات يا رقص ،وبناء في السد.

‎المصريون.. حسوا بالكارثة أخيرا، قامت الحكومة قالت للوزير المغازي رد علي الجماهير القلقانة، قام المغازي أعلن عن اكتشاف جديد خطير، عبارة عن بير مية كبير عرفوه المصريون من55 سنة فاتت يكفي المصريون 100سنة جاية !!

‎الإثيوبيون..قالوا للمصريين مبروك يا فالحين مالكوش حجة ،ومافيش قضية! المغازي بتاعكم قال إن عندكوا مية كتير ومش محتاجين مية النيل.

‎المصريون قالوا بس ده ما يصحش واحنا جيران وان ما رجعتوش عن السد احنا هنزعل بجد !! الإثيوبيون قالوا...زعلانين إزاي واحنا اللي بننفعكم !!

‎المصريون..رفعوا حواجبهم وتعجبوا قائلين بتنفعونا ده إيه منك ليه !!

‎الإثيوبيون قالوا..الحديد والأسمنت اللي بيبنوا السد بتقدمهم لنا شركات مصرية، وأعمال شبكات الكهرباء للسد بتنفذها شركة مصرية، والشركة اللي بتنقل كل مواد البناء للسد..برضة مصرية!!

‎المصريون بصوا لبعض وسألوا إيه ده ؟ الكلام ده هزار ولا جد !!

‎الإثيوبيون ضحكوا ضحكة ساخرة وقالوا...ابقوا اسألوا "المغازي".

‎المصريون قالوا..عوضنا علي الله..والإيد اللي ما تقدرش تقطعها "بوسها" وابعت شركاتك تعمل معاها شغل ويبقي ختامها"بيزنس ".