يا شماتة أبلة ظاظا فينا. أبلة ظاظا مين؟. اخرس.. دى عصابة الإخوان وفضائياتها ومواقعها وتواصلها. شمتانة ليه؟. لأن «حلمى الهياتمى»، محافظ السويس، فقع تصريحاً حيَّا فيه الأم المصرية فى عيدها لأنها «اخترعت المسقعة والبيض بالحمص».. آه والله!. وسبق للمحافظ الهياتمى أن «تهيتم» و«جخ» وقال إن اليهود (يقصد إسرائيل) لو أرادوا ضرب مصر سيرتد إليهم سلاحهم بفعل الرياح الشمالية الغربية. يعنى: «الهوا هوايا» ستكون أغنية الحرب!. وطالب بتصدير الكلاب الضالة لتوفير عملة صعبة، وقتل البراغيث للتخلص من الفئران بنظافة!. وقال إن مصر محمية لأن البحر «حنيّن» والمحيط لما يهيج بيبقى خطر على أوروبا. روح يا شيخ.. ربنا ما يحرمك من «الهيتمة»!