نفسى اتجنن.. وقبل اليأس يجيلى ألزهايمر.. تفتكروا كده أنا مجنونة بجد؟
أيوه طبعا مجنونة.. هو اللى بيحصل ده مش جنان؟!
النسيان في حالتك يا وطن يمكن يكون الحل..
إذن .. كاسك يا وطن!

• يادى النايبة!!
قال النايب دتو ستين نايبة سى عاتيف بتاع بنى سويف ودعم مصر (اومال لو كان لسرقة مصر ونهبها كان قال إيه) بيقول بجرأة و"دجرمة وقلة رباية" إن المملكة مديونة بسبب مصر.. وإن قال إيه تيران وصنافير ما يسووش 20 مليارًا.. وإننا كشعب سافل وعديم النخوة يعنى "بنعض الإيد اللى اتمدت لنا" وازاى نقلب الدنيا على حتة جزيرتين مش مستفيدين منهم!!
وإن السادة النواب والنايبات "وقفوا تحية للملك لأنه زى والدهم"!!



وإن الفيسبوك مسخرة.. ويا ريت يقفلوه عشان الأخلاق ترجع تانى!!
وإن المتظاهرين بتوع «جمعة الأرض» عايزين يسقطوا الدولة والرئيس عبد الفتاح السيسى وإنهم حاجة تكسف، وإن اللى يعارض وما يسمعشى كلام الرئيس منهم خونة ومأجورين.
"دتكم ستين خيبة يا خونة يا ولاد التيت".

• عواد باع أرضه تانى بعد دم أهله

فيه واد جدع صاحبى ع الفيسبوك اللى كارهينه اسمه أحمد العتر بيكتب بوستات رااائعة قررت أسرقها بعد إذنه، ومنها كلمات ناس وناس لفريق كايروكى اللى بيغنيها أمير عيد:
فيه ناس ماتت عشان تعبر، وترفع يا بلد اسمك
وناس عاشت عشان تهبر، وتنهش حتة من جسمك
فيه ناس حاربت عشان أرضك روت من دمها أرضك
وادت يا وطن فرضك، بدون لحظه ما تتردد
فيه ناس ماتت عشان مبدأ، سنين بسلاحها فى الخندق
ومين ممكن يكون أصدق؟
من اللى عشانك استشهد!



فيه ناس ماتت بلا زفه وسابت مصرنا واقفه
ولو يتحطوا فى الكفه بطل منها بجيش كامل
لا تعرف يعنى إيه تطبيع، ولا معنى انك انت تبيع
تاريخ أمه خلاص بيضيع، فى وهم اسمه سلام شامل
فيه ناس قضت على الجبهه، سنين مكويه بلهبها
تاريخنا عمره ماجابها، ولا سجل حكايتها
لا سألت عن مكاسبها، ولا العيله اللى هتسيبها
ولا كانت بتحسبها وضحت راضيه بحياتها
فيه ناس حاربت ومش عايزه ولا تكريم ولا جايزه
وقابلت ربها فايزه بجناته ورضوانه
وناس عاشت عشان تحرق، وطن، وفى ثروته تسرق
ويهرب ابننا ويغرق، فلا عاشوا ولا كانوا
فيه ناس لاجل البلد صنعت، ملامح نصر بيه رفعت
رقابنا فوق ولا طمعت فى مال يا مصر أو شهره
فيه ناس لاجل البلد قاست، وفوق المستحيل داست
وناس من بعدها عاثت فساد فى أرضك الطاهره
من الشهدا فى عبور الجيش
إلى الشهدا فى طابور العيش
سنين فاتت وماقدرتيش تصونى نصرك الغالي
فيه ناس سرقت ثمار النصر
وباعت كل حاجه فى مصر
وخلتنا نعيش فى عصر
(ماهيش بلدى وانا مالى).
#كايروكى
#عواد_باع_دم_الشهدا

• بلدى أوى يا حسين
ما كان خلاه ينزل قاهرتنا المُعِزية.. الحقيقة بلدى موووت.. أن السيد الرئيس الفرنسي هولاند ييجى مصر يروح قصور أشبه بطرازه الفرنساوى المذهب.. ويقعد على كنب وكراسى لوى كانز ههههههه
من أكاونت الجدع وعلى فكرة العتر يعنى جدع.. قال:
"احمد العتر الخديوى السيسي عامل أوبرا للرئيس الفرنسي هولاند فى قصر عابدين، وقاعد عامل مستمتع وهو بينام تماما، المدنية هى الأوبرا طبعا فى تخيله، زى هتلر مثله الأعلى، طب كنت هاتله أحمد شيبه أو عباسط وكلف على قعدتك واهو تسمعه الغنا بتاعنا يمكن يحسوا بغلبنا واحنا مستنيين الزهر يلعب. بس هو بالنسبة للحفلات والأوبرا والسهر بره، ماكانش لماما أى اعتراض عليها! وعلى رأى عم نجم رضى الله عنه: "فى كل حارة حسرة، وف كل قصر زينة".
وجه حد لطيف اسمه عمار شهبندر رد قاله: "هولاند عايش حياة عادية جدا ولطيف وعلى فكرة هو يصنف من الطبقة المتوسطة ولا يهتم الال بمصالح الشعب اللي اختاره لقيادة فرنسا".
لا مؤاخذة وباردون "معلهش يا زهر".

• خارج السياق.. قلتلهم بحبه
"سألونى تقربيله إيه؟ قلتلهم بحبه.. قالولى مش كفاية"
آه يا عاطف يا طيف..