في رحاب مقام المصطفي صلي الله عليه وسلم وحيث مرقده الشريف التقي السني والشيعي جنباً إلي جنب يصليان علي النبي الأكرم في صوت واحد.. ثم عند الكعبة تلاقيا وكلاهما يناجي ربه الواحد الأحد وفي الفندق تقابلا في المصعد وأمامهما رجل عربي يحمل جريدة يقول المانشيت الرئيسي فيها "المصالحة بين السنة والشيعة مستحيلة" ونظرا إلي بعضهما في دهشة:
السني : أنت بتحبني؟
الشيعي : وأكرهك ليه يا أخي ثم ان أرض المحبة المطهرة قد جمعتنا!
السني : تقصد السعودية؟
الشيعي : وفيها إيه!.. أليست هي الأرض التي تضم في رحابها الكعبة المشرفة وقبر رسول الله صلي الله عليه وسلم؟
السني : طيب لما أنت بتحب الرسول بتكره الصحابة ليه؟
الشيعي: أنا شخصيا لا أكرههم لأنهم صحابة رسول الله.
السني : مش بتكرههم.. وبرضه مش بتحبهم؟
الشيعي : وعلي كرم الله وجهه أليس من الصحابة؟
السني : أنت بتعتبره ولي الله!
الشيعي : القرآن الكريم يقول في العموم "ألا إن أولياء الله لا خوف عليهم ولا هم يحزنون".
السني : لكن أنت لا تساوي بين علي رضي الله عنه وباقي الصحابة.
الشيعي : "وفضلنا بعضكم علي بعض"؟
السني : ماشي.. لكن حديث النبي صلي الله عليه وسلم أن المسلمين كأسنان المشط كلهم سواء.
الشيعي : لو شرحت لك بالتفصيل أخشي أن تفهمني بطريقة غلط.. وتظن أنني أريد تشيعك؟
السني: وأنت مش خايف أخليكي سني؟
الشيعي : أنا سني فعلاً.. لأن سنة النبي صلي الله عليه وسلم من صميم إيماني!
السني : ان كان كده يبقي أنا من شيعة رسول الله صلي الله عليه وسلم.. وواحدة بواحدة!
الشيعي : احنا مش اخوات في الإسلام؟
السني : بس عندك حاجات أنا مش مقتنع بيها..!
الشيعي : لكن فيه حاجات عندي لازم تقتنع بيها.. أهمها شهادة أن لا الله إلا الله وأن محمدا رسول الله!
السني : كده عندك حق؟
الشيعي : وأنا نفس الشيء إيماني لا يصح بدون هذه الشهادة.
السني : والاختلافات!
الشيعي : خلينا نتكلم في نقطة الاتفاق وهي أساسية.
السني : أنت أخدت بالك من العنوان اللي كان في الجريدة؟
الشيعي : ما هو اللي خلانا نتكلم!!
السني : لا وأنت الصادق خلانا أهملنا العنوان اللي تحت منه واللي كان بيقول إسرائيل تعتدي علي المسجد الأقصي!!
الشيعي : أنا ممكن أموت في سبيل الأقصي.
السني : وممكن تموت في سبيل الكعبة المشرفة؟!
الشيعي : عندك شك في كده؟
السني : الشك ممكن ينتهي من قلبي وعقلي يوم ما ألاقي إيران بطلت تحط مناخيرها في كل بلد سني.
الشيعي : أنت كده بتتكلم في السياسة وأنا باكلمك في الدين.
السني : ما هو لو رجعنا لأيام عثمان وعلي رضي الله عنهما هتعرف ان الاختلاف مكانش علي الدين لكن علي أمور الدنيا اللي بنسميها سياسة.
الشيعي : ولما اليهود بيحاولوا يفرقوا بين المسلمين سنة وشيعة بخلاف المذاهب والطوائف والملل اللي ملهاش أول ولا آخر.
السني : يعني ايدك في ايدي نحارب أعداء الإسلام اللي هما اليهود والصهاينة.
الشيعي : معلهش ايدي مش فاضية دلوقت باعمل قنبلة نووية!!