إنك تسافر وتبات مع صحابك اللى كلهم بيشخروا وانت اولهم.. المشكله بتكمن فى مين هيلحق ينام الأول.. عشان اللى هينام الأول ويبدأ شخير بيبقى حكم على الباقيين إنهم يسهروا يستمتعوا بسيمفونيته البديعه.. وأكاد أجزم أن بعضهم بيحكى قصته من خلال شخيره.. تشخيره فيها فرح.. تشخيره حزن.. تشخيره شجن.. المهم ان انت بيبقى هدفك الأسمى انك تنام الأول.. ولو لمحت واحد فيهم بيتاوب وانت مش جايلك نوم بيحصل هلع.. لان قلق الفكره نفسها.. والضغط اللى عليك مبيخلكش تنام.. فبينتهى بيك المطاف انك صاحى طول الليل يا اما من الرعب أو من تشخير الفائز الاكبر اللى نام الاول.
لذلك منتجنا بيحل المشكلة دى تمامًا.. سدادة الأذن العجيبة.. نام وافتح بوقك.. حشرج من قلبك.. غرد.. اعزف.. تفنن فى ابداع لحنك الخاص.. ويا أيتها الأم الثكلى.. وايتها الزوجه المترملة.. وايها الابن الذى فقد الاب والاخ.. ويا كل ضحايا الحشرجة.. املأوا الأرض بنغمات التشخير وأطلقوا العنان لطبقاته.. املأوا الصدور والقلوب بآمال التشخير.. اجعلوا الشخير انشوده حقيقية تعيش وتثمر.. اجعلوا التشخير هواية بلا قيود.
و اذا كان حد من صحابك بيمتلك حشرجة بترددات عاليه خارقة للسدادات.. فأحنا بردوا عملنا حسابنا.. بيبقى مصاحب للسدادة مسدس مزود بكاتم صوت تقدر تنهى بيه المشكلة من جذورها لحد أطرافها.
اتصل دلوقتى علشان تلحق العرض الكومبو .. علبتين طلقات هدية مجانًا.