< ياترى.. لسه فاكرين.. الملاك ده؟!
-يا راااااجل عيب عليك.. هو عادل القاضى ممكن حد ينساه؟!
هو «عادل» فى حياته كلها.. بس ظلمنى أنا.. لأنه مشى من غير ما يقولى!!
هو «قاضى» يراعى الله فى أحكامه وسلوكه.. لكنه جار على قلبى.. دون أن يسمح لآخر غيره.. بالإقامة فيه!!
مات عادل القاضى صحيح.. لكنه والله عايش فى قلوبنا.. بضحكته الصافية..بابتسامته البريئة.. بروح الطفل التى لم تفارقه حتى رحيله!!
كنت أقول له دائماً.. والله يا عادل أنت الوحيد.. اللى بتاخد حسنات.. من غير ما تعمل أى حاجة فى دنيتك!!
فيسألنى ضاحكاً.. إزاااااى بقى.. يا بنى آدم؟!
فأقول له: لأن الواحد كل ما يبص فى وشك يسعد.. وسعادة البنى آدمين ثواب كبير عند ربنا.. عشان كده يا عم.. انت شغال تلم حسنات على الفاضى والمليان..فيحتضننى وعيناه تترقرق فيها الدموع!!
طول حياته قصة كفاح.. من أجل إسعاد غيره.. أسرته.. أمه.. أخوته.. أكلت منه الغربة راقاااات.. من أجل توفير قوت أولاده وتأمين مستقبلهم.
عشان كل ده قلت.. وأطلقت على حبيبى عادل.. «شهيد لقمة العيش»!!
وفى الآخر استقر عادل فى قبر صديق عمره.. ورفيق كفاحه عادل صبرى..أطال الله عمره.. هنئياً لك يا صبرى بصحبة عادل القاضى فى القبر.. وربنا يعوضنى أنا عن كده بصحبتك فى الجنة يا حبيبى.
.. والله لن ننساك حتى نلقاك.. يا أغلى وأحب الناس!!
سامعك بتقولى ضاحكاً.. طول عمرك أصيل يا عصوم!!
وها أنا أقولك.. وهو فى حد قالك أنى قليل الأصل يا بنى آدم!!
ﻻ والله يا عدول أنت مش بنى آدم.. أنت والله ملاك عاش بينا.. وفجأة تسرب من بين أيدينا.. والله لو كانت تحميك رموش عنينا.. لأغلقناه عليك إلى الأبد!!
سامعك بتقولى بطريقتك المحببة المعهودة.. والله بقيت كاتب وبتتعلم فى الكتابة يابن العبيدى؟!
هاقولك وبعدين بقى.. لم لسانك.. وخليك فى الجنة ونعيمها اللى أنت عايش فيها.. بس والنبى خليك كريم زى ما كنت طول عمرك.. احجزلى مكان جنبك..مش أنا حبيبك برضه زى ما كنت بتقول.. وﻻ كلام أونطة وخلاص!!
سؤال أخير يا عادل عشان ما أطولش عليك.. وأشغلك عن جنتك ونعيمها.. هى الجنة حلوة قوى كده يا عدول؟!
سامعك بتقولى.. اعمل فى دنيتك كويس.. عشان تيجى جنبى هنا.. فى الجنة!!
ماشى يا عم عادل.. حتى وأنت فى الآخرة برضو بتنصحنا.. وعمال تلم حسنات على قفانا.. ماشى يا عدوووول!!
الله يرحمك يا عادل.. يا أغلى وأحب الناس.