< الأسبوع الماضى كتبت مقالا ساخنا ..حول برنامج صباح الخير يامصر.. وافتقاد القائمين عليه للحيادية وابسط القواعد والاصول المهنية.. وذكرت ذلك لان البرنامج استضاف لواء شرطة سابق - بمفرده - للحديث عن ازمة الداخلية مع الصحفيين.. دون استضافة صحفى فى الحلقة - حتى لو عن طريق مداخلة تليفونية - للاستماع لكافة اطراف الازمة ..وعلى المشاهد ان يفهم الحقيقة..ويحكم على مختلف الاطراف !!
< ده اللى قلته ياسادة ياكرام.. الاسبوع الماضى بالتمام والكمال. .دون زيادة إو نقصان !!
< وعنها يامؤمن والعيال ولاد الخبيثة ..قالوا فى نفسهم ورحمة خالتك ياعبيدى.. لنخليك تندم على اليوم اللى هاجمتنا فيه !!
< قووووم اييييه يامؤمن.. لعبوا معايا لعبة شريرة.. فاستضافوا المرة دى صحفى - بمفرده ايضا - للحديث عن الأزمة!!
<وقبل ان اسمع آراء الضيف.. قلت فى نفسى برضه انعدام مهنية..وفقر فى الحيادية.. يا ولاد الفقرية.. ده اللى قلته فى نفسى.. قبل الضيف ما يرد على السؤال حول الأزمة.. لأن من الطبيعى ان ينحاز الضيف لمهنته.. سواء كان ضابطا أو صحفيا!!
< وعشان ما اطولش عليكم ياسادة ياكرام.. بدأت اسمع اجابات الصحفى..ففوجئت به - لا فض فوه - يشن هجوماً حادا على نقابة الصحفيين وعلى زملائه فيها..ويتهمهم بكل نقيصة وسوء.. من قبل الكلام الخايب الذى بيردده العوام..فى التقارير التليفزيونية «المتفبركة» التى تجرى فى الشارع.. من ان الصحفيين افتعلوا الازمة من غير لازمة.. وانهم يسعون للصدام مع الداخلية.. وهدم مؤسسات الدولة.. وأن على رأسهم ريشة.. وهنا قلت الله يخرب بيتك يا بعيد.. ده لو التليفزيون جاب اصغر مخبر فى الداخلية.. مكانش هيقول احسن من اللى انت قلته!!
< ولاقيت نفسى أصرخ فى القائمين على امر البرنامج.. الله يخرب بيوتكو يابعدا.. يعنى حتى لما تجيبوا لنا صحفى يتكلم عن الأزمة.. تجيبولنا مخبر بشريطين!!
< إذا كان الأمر كده ياجماعة.. بلاها صحفى..وهاتولنا مخبر من لاظوغلى أرحم.. احتمال ربنا يفتح عليه بشوية حيادية.. وبعض الضمير..مش زى اخونا الصحفى الفالصو اللى جايبينه ده!!
< طبعاً الأمر مش تلقائى.. لأن أولاد الخبيثة.. عارفين آراء الضيف من قبل..وجايبينه مخصوص عشان يقول الكلام الخايب اللى قاله ده.. لأن المعد قبل ما يجيبك فى برنامجه.. بيبحث فى كتاباتك فى الصحف.. أو على صفحتك على الفيس بوك أو تويتر.. أو حتى بيكون سمعك فى برامج أخرى!!
< يعنى باختصار عارف سعادتك هاتقول ايه بالضبط.. وبيستخدمك زى ماهو عايز زى ماحصل.. مع الصحفى الخايب إياه. .اللى انا بتوقع له مستقبلا مبهرا فى دنيا النفاق.. مع اشقائه اياهم بتوع الفضائيات من عينة موسى والخياط وصلاح!!
< يعنى هم قالوا بقى انت مقهور ومتضايق.. ياعم عصام م الضابط.. طيب اهو جبنالك صحفى.. مخبى الدبورة تحت بدلته.. عشان نقول وﻻ يوم من ايامك ياسعادة اليوزباشى!!