- سلامو عليكو يا رجاله • أهلا بالزبون الجديد.... قلب نفسك ياض - نعم حضرتك !! مش فاهم • حضرتك !! هاع هاع هاع هااااى...طلع ياض الفلوس والسجاير اللى معاك أخلص - أنا مش معايا فلوس والله ولا بشرب سجاير أصلا... وبعدين أنا هعمل إيه بالفلوس وأنا فى السجن هنا • انت شكلك ابن ناس ياض.. وصعبت عليا..تعالى ياض اقعد ماتخفش، انت من النهارده فى حمايتى.... اعرفك بنفسى بقى.. محسوبك المعلم أبو دومة كبير السجن هنا وجاى فى قضيه قتل، وده عبده مصايب أكبر نشال فى دول حوض النيل.. وده بيومى كوارث وجاى هنا فى اغتصاب، وده معاطى الواطى وجاى هنا فى قضية سرقة مع الإكراه، واللى هناك ده سيد أبو شمة وده ماشاء الله من أكبر تجار الصنف، وآخر واحد ده بقى اسمه جمال أزمات وده الله أكبر عليه تاجر سلاح أد الدنيا وكلنا هنا بنيجى السجن زيارات خفيفة مابنطولش انت بقى جاى فى ايه؟ - بوست • آه حادثة يعنى، ودوست على مين بعد الشر -حادثة إيه بس.. بقولك بــوست • آه آداب يعنى... وبوست مين بقى لا مؤاخذة - يا معلم آداب إيه... بوست على الفايسبوك • وده يطلع ايه البتاع اللى بتقول عليه ده لامؤاخذه ياسى الأفندى - ده يا معلم موقع على النت كده الناس بتكتب رأيها عليه وبيتكلمو مع بعض وبيشوفو أخبار البلد • طيب فين بقى المشكله لا مؤاخذه - ههههههه... أنا مش مستغرب من ملامك يا معلم.... لأن المنطق مالوش دعوة بالثقافة أو السلوك • بص ياسى الأستاذ... أنا مافهمتش الكلمتين اللى فى الآخر دول بس أنا شايف إن لما الناس تتكلم مع بعضيها وتاخد وتدى لا مؤاخذة فى أحوال حياتهم براحتهم...ده من حقهم.... لأن أكيد الحكومة أكبر بكتييير أوى من إنهم يتضايقو من واحد بيقول رأيو على النت.. وشايف كمان إنو بيخفف الكبت اللى جوا الناس من العيشة الصعبة وتعب أكل العيش - بس هما اتضايقو يا معلم... وادينى قاعد جنبك أهو لمجرد إن بقول رأيى بمنتهى الأدب ومش قاصد بيه حاجه وحشة • معلش يا هندزه أكيد فى حاجة غلط...... وناوى تعمل ايه طيب ؟ - هعمل اللى يخلى البلد مبسوطة منى • هاتعمل إيه يعنى ؟ - انت خارج امتى يا معلم ؟ • الأسبوع الجاى بالكتير بإذن المولى - طب مش عايز صبى ؟