< بالأمس.. طلبت من البواب تغيير أنبوبة البوتاجاز.. ففوجئت به يعتذر ويقسم بعدم وجود أى أنابيب لديه!!
ولم يكتف بهذا.. وإنما سألنى باستنكار: هو سيادتك ماتعرفش إن فيه أزمة شديدة فى الأنابيب الأيام دى.. لدرجة أن تمن الأنبوبة النهارده وصل 60 جنيه بالتمام والكمال؟!!
تعجبت وقلت: أزمة بوتاجاز فى الصيف؟.. دى تنفع نكتة.. أومال لما ندخل على الشتا.. هنولع فى نفسنا وﻻ إيه؟!
< النهارده.. كنت عايز أحكى لابنتى.. حكاية على بابا والـ40 «مليون» حرامى!
< لو تسألنى إيه أخطر شىء حدث فى بلادنا.. خلال السنوات الأخيرة، لقلت لك: إن الفساد ما بقاش عيب.. وﻻ فيه حد.. بيتكسف منه!
< سؤال محيرنى.. لو واحد «فاسد».. اتجوز واحدة «فاسدة» هيخلفوا إيه؟!
< بعد أن تغلغل الفساد وانتشر فى البر والبحر والجو.. حد يشوفلنا تذكرة لـ«كوكب تانى».. بتاع أخونا مدحت صالح!
< هذا البرلمان بالفعل.. هو برلمان «الثورة».. ولكنها -لامؤاخذة- الثورة «المضادة»!
< تخيل يا أخى.. أنا أعرف صاحب «شونة» أمين.. لا هو ضلالى وﻻ حرامى!!
- إحنا هنفشر من أولها.. معقولة دى.. فين الكائن العجيب ده بقى؟!
- فى «المكسيك».. يا ننوس عين ماما!!
< بصراحة نفسى.. ومنى عينى.. بسرعة نشوف شركة مضمونة.. ونأمن على الأهرامات وأبوالهول.. مفيش حاجة دلوقتى بقت مضمونة.. وولاد الحرام.. ماخلوش لولاد الحلال حاجة يا عم!
< الشىء المؤكد أننا فى مصر فشلنا.. فى اقتلاع «جذور» الفساد.. أو حتى «تقليم» أظافره!
< بسم الله.. ما شاء الله.. أكثر «شجرة» فى مصر بتطرح وتدى إنتاج وفير -دون أن تحتاج إلى ماء أو كيماوى- هى شجرة الفساد!
< لصوص الشون.. يدفعون الملايين.. من أجل الفرار من السجن!
ده واضح.. أنها لم تكن مجرد «شون» لتخزين القمح.. دى كانت مغارة على بابا!
< «الوكيل» حوت السكر.. بينتقم من الشعب.. لإزاحة وزيره وخليله!
< النهارده.. اشتريت كليو السكر بـ8 جنيه.. يعنى الكيلو زاد أكثر من 3 جنيهات فى أسبوع!
وكأن جنابه عايز يقول للشعب.. من النهارده مفيش حكومة.. أنا الحكومة!
< والنبى ياخوانا.. اللى يقابل حد.. م الحكومة دى (......) عليه!
< إذا كان لدينا وزراء عالميين - كما قال الرئيس - يبقى العيب فى الشعب بقى.. وهو اللى وصلنا للحالة الزفت.. اللى عايشين فيها.. إخص عليك يا شعب يا كخة!
< دعاء على طريقة.. الشيخ «مورتا»..
يا رب خد ميتين.. أم الحكومة دى.. خلاص قرفونا.. فى أم العيشة دى!
< فى الماضى كان أشقائى المسيحيون.. يشكون من «اضطهاد» الحكومات!
الحمد لله النهارده.. جاتنا حكومة بتضطهد الشعب كله.. بمسلميه ومسيحييه.. برفعها الأسعار كل يوم، وضرايبها الملعونة.. ده على أساس أن «المساواة» فى الظلم عدل!
< ماشى يا عم جاك.. أهو بقينا خالصين.. ومفيش حد أحسن من حد.. كلنا فى الاضطهاد مصريوووون!