< فقد المصريون شخصيتهم الحنونة الرقيقة الطيبة المنتمية إلى جذورها الممتدة عبر قرون ودروب الزمن الجميل.
< فقد تحورت العواطف وتبدلت الأحاسيس وتاهت مقاييس الجمال وانغمست المشاعر فى الماديات واندفعت الأحاسيس لإشباع الرغبات الحيوانية دون وعى ولا مشاعر ولا حتى إحساس.
< حبيبى وعدنى إنه يجيلى يوم الأحد.. وصدقت وبقالى أسبوع بايت فى نار.. قالولى ده جه وبيخبط.. اتلخبط وما صدقت لأنه قالها كتير وهرب وعمره لا خبط ولا جه.
< لونى اتغير وعيونى بقت مخطوفة ده حلمى ومنايا بس أنا تصدقوا مكسوفة.. هه هه والنبى مكسوفة.
< سمعته بيتكلم.. الله ده جه! ندهولى.. دخلت وعماله أدارى فى كسوفى وأشواقى.. وهو بإيدى يا عالم دى حاجة عادية ومعروفة.
< نورت الدنيا وفرحت لما جيت بعنيك وحنانك حواليك قمت من عبطى وحرمانى صدقت وسلمت وتهت.
< أتمنى قربك ونبضة قلبك وعنيك اللى حاضنة عنيه قلبى فيه الفرحة المجنونة يا ريت كل البنات تبقى شبهى والولاد حالهم يبقى حالى.
< بنيت أحلامى جوايا.. دنا طول عمرى ما بجريش ياه لقيت نفسى أتلخبط وبجرى وبعطى وأضحى.. أتارى الجرى ورا أوهام.
< تهت ودبت وقت يا مصيبتى دهم ما يتلم والوقت بيجرى لازم أتصرف وأتصرفت أصله هرب ذى عوايده.. العقل بينسى لكن جرح القلب له أحكام.. الصدمة خفت وتهت مع الأيام والجروح جوايا محوطاها بعنيه.
< اتغيرت واتعلمت هو فيه حد فى الدنيا دى أتعلم ببلاش.
< يا حبيبى كنت خليك فى قلبى.. بيتك وعشتك دنا ما صدقت لقيتك يا حبيبى دنا لسه بناديك خليك ولا تزود القلب جروح.
< عايزنى أنساك طب إزاى ده قلب مجروح وعيون مخطوفة.
< ده الزمن وطول العمر بتصفى وجروح القلب ممكن تشفى وعيونى اللى ما بتغضب.. يا حبيبى خليك وأنا قلت نسيت هو صعب النسيان!
< وتاهت الأحلام وعدت الأيام.. وانجرحت قلوب وانخطفت عيون وناس عايشة تايهة ومخطوفة وراحت أحلامها وعدت أيامها ولا شافت مصر ولا حتى حبة حنية.. ولا حتى والله البسمة ساعة الصبحية.
< كلنا قال عايشين لأ ده إحنا ماشيين فى القطيع نسمع فى كلام وحديت وحلول وخطط وآمال وحسابات ومشاريع وأرقام ومواكب واحتفالات وبدل وكرافتات وخطط لبكرة وبعده وبعد الثلاثين عام!
< لا كسبنا الحب ولا ذقنا الحنان وعشنا المرارة والحسرة والحرمان وتاهت الأقدام وسط المجارى والعشوائيات وسياراتهم الفارهة تناقض بشرى عمره ما يكون ولا كان.
< وفى آخر الأيام شالونى وحطونى فى غيابات الجب ودفنوا معايا قلبى المجروح وعيونى المخطوفة وكل ذكريات عمرى الحلوة والمعطوبة.


المنسق العام لحزب الوفد
رئيس لجنة الثقافة والفنون