فجأة رن هاتفى المحمول..إيه ده رقم غريب خالص.. دى حتى مش تابع لاى شبكة.. من شبكات المحمول التلاته.. ومع اندهاشى الشديد.. وقلقى الأشد فتحت التليفون..لافاجأ بأغرب مفاجأة.. لم اكن أحلم بها فى حياتى
< ألو.. إزيك يا عمو..
- أهلاً وسهلاً.. مين معايا؟!
< أنا واحد.. لسه ما بقاش له اسم!!
- احنا هنهزر يابنى؟!
< لا ياعمو.. ماتفهمنيش غلط.. انا لسه فى بطن أمى.. وبعد كام يوم هنزل للدنيا واتولد!!
- يعنى انت بتكلمنى من بطن الوالدة..وعايز ايه منى بقى ؟!
< بصراحة ياعمو أنا بسمعك.. مع بابا وماما وانت بتتكلم فى التليفزيون.. فقلت أستشيرك فى أمر مهم!!
- قلت ايه مشكلتك.. وانت لسه ما طلعتش م البيضة؟!
< بصراحة انا متردد اتولد.. وانزل للدنيا بعد كل اللى بسمعه.. من ماما وبابا والمحيطين بيهم عن حال البلد.. والظروف اللى مش وﻻبد!!
لدرجة اننى ليل نهار.. اسمع خناقات بابا وماما.. وكلها على الفلوس والمرتب.. اللى ما بقاش يشترى أى حاجة.. لدرجة ان بابا بيقول لماما لازم نتقشف.. زى الحكومة ما بتقولنا!!
وطبعاً امى صرخت فيه.. كمان يا متعوس عايز تموت الواد.. من الجوع فى بطنى.. فسكت الغلبان وقالها.. يعنى هكفيكم منين وﻻ منين.. الشغل واشتغلت شغلانتين.. ومع ذلك مش مقضى على طلباتكم.. بعد الاسعار ما ولعت نار..فى كل السلع!!
- قلت: كل اللى سمعته ده.. ومصمم برضه تترك عرشك..وتنزل لدنيانا المهببة دى.. بالذمة انت عندك ريحة العقل وﻻ الدم
وهنا سألته: وعموما انت المفروض.. هتنزل للدنيا امتى تحديداً
< خلال شهر.. يعنى ممكن فى العشرة أيام الاولى.. من شهر 11
- بصراحة.. بصراحة ما انصحكش.. فى اليومين دول تحديداً!!
< ليه بقى؟!
- عشان هيلبسوك قضية..وممكن يتهموك بالتخطيط.. أو المشاركة فى مظاهرات 11 / 11 وبكده تروح فى ستين داهية!!
< ﻻ.. ﻻ ياعم خلينى فى بطن امى أحسن.. أنا كده فى الأمان.. لا عايل هم أزمة سكر.. ولا غلاء أسعار.. وﻻ خوف من اللومان!!
- طب والنبى يانونو.. ما تخدم عمو عصام وتشوفله.. مكان فاضى جنبك!!
< ياعم انت خليك فى دنيتك.. اللى ربنا ابتلاك بيها.. كمان هتشاركنى فى بطن أمى.. اللى يادوب سيعانى دلوقتى!!
- اخص عليك نونو.. قليل الأصل بصحيح..أكيد طالع للمدعوق أبوك!!