الناس محتاجة تفهم هو فيه ايه؟! .. وليه الأوضاع كدا؟! ومين السبب وراء الأزمات المتلاحقة دي؟! .. وهل السادة المسئولون يعرفون الأسباب، أم أن الجهل هوسيد الموقف؟! وإذا كانت الأسباب معروفة، فالمواطن عاوز يعرف ومن حقه أن يعرف علشان يقتنع ويقرر: يرضي بالمكتوب ويصبر أم ....!! أما إذا كان محدش عارف من المسئولين أسباب الأزمات ايه، فكدا احنا رايحين في داهية .. والحقيقة أشك تماما أن المسئولين في بلدنا مش عارفين.

طب والحل؟!

المثل البلدي بيقول: الصراحة راحة. يعني نصارح الناس بالحقيقة.

آه ..لوفي كارثة في الفلوس نقول، لوالدولار مش موجود نقول، لوخطأ وزير أومجموعة وزراء نقول ونحاسب، لوفساد نكشفه ونفضح داعميه والمصريون هيكونوا نعم الداعم والسند، لومؤامرات خارجية نحدد بالاسم ونؤكد بالدليل ونواجه بشراسة، لو.. لو.. لو. الناس في البلد دي مش عاوزة حاجة والله. أوبوضوح اكتر مش عاوزة كتير. أكل وشرب وتعليم وصحة ويمشي الحال. الناس مش عاوزة فلوس كتير، عاوزين فلوس تقضي احتياجاتهم بس. كان زمان الحال يسيير، وزمان بتاعي يعني التمانينات والتسعينات، يعني مش بعيد .. والنبي عرفونا علشان نريحكم ونرتاح.