عندما تمسك القلم لتكتب تحتار تكتب إيه واللا إيه.. الحاجات بقت كتير قوي وكلها بسرعة وتحتاج لأضعاف المساحة.. وعشان ما نضيعش وقت ندخل علي القرارات الاقتصادية وزيادة أسعار الوقود.. ومش هاتفلسف وأتقرنن زي غيري لكن لأن ما يهمني هو الناس هسألهم: تفتكروا هانجيب فلوس منين وكلنا شايفين.. لا في إنتاج.. ولا فلوس جاية من بره ولا السماء تمطر ذهبا.. وكم كتبت مرارا وتكرارا ان الظروف اللي بنعيشها كلنا تحتم علينا أن نصرف علي نفسنا ولو استحملنا شوية مع حبة صبر هاتفرج وهاتبقي عال العال وعلي الأقل مش هاندي حد من إياهم فرصة يلعب بدماغنا ويولع ويسخن الدنيا وهي مش ناقصة بصراحة عشان كلنا علي الآخر.. ومش تخويف لكنها الحقيقة اللي عشناها أربع سنين زي الزفت بعد 25 يناير.. نستحمل واللا الدنيا تخرب وبدال ما ناكل رغفين مش هانلاقيهم وبدال ما الدنيا تمشي بالدول وبالعرض محدش يخرج من بيته ونلاقي القتل والسرقة في كل مكان.. بجد فكروا حبة صغنين هاتلاقوا كلامي مظبوط.. واللي بيشيل قربة مخرومة بتصر علي رأس أمه!!
وكلما حاولت الابتعاد عن ماسبيرو وقرفه لأن لا أحد يسمع أو يفهم ما نكتبه وزهقنا وقرفنا بجد.. افاجأ بأن ما أكتبه صحيحا.. واللي يجنن ان الإخوان في ماسبيرو مركز قوي ومحدش يقدر يهوب ناحيتهم وبيعملوا اللي عاوزينه.. ومن كام يوم انتشرت دعوات إرهابية علي النت تدعو أعضاءها لإحداث فوضي في كل مكان وأول امبارح يطلع عصام إمام - مدير عام الإعداد والتنفيذ بالقناة الثانية - ويلقبونه بالمرشد العام لماسبيرو ومعاه مجموعة من مخرجي التنفيذ إلي مكتب مجدي لاشين رئيس التليفزيون وطالبوه بالوفاء بوعده لهم بأن يعملوا بنظام "الشيفت" وليس بالمسئولية عن برامج الهواء.. وتردد بقوة ان عصام طالب "لاشين" بأن يكون هو المسئول الأوحد عن الهواء بالقناة وألا تتدخل رئيسة القناة في ذلك ويتردد أيضا ان لاشين وافق علي الطلبات وسيتم التنفيذ أول الشهر القادم.. يعني بالبلدي لا يستطيع رفض أي طلب للإخوان حتي لو كان الهواء هايجيب مصايب وكوارث ولمن لا يعلم تنفيذ الهواء هو أخطر شغلانة في التليفزيون وما يتردد ان هذا اتفاق بينهم والله أعلم.. ويبدو ان الكل نسي ان عصام إمام كان مسئولا عن إذاعة خطبة للإرهابي الراحل سيد قطب منذ فترة وتمت الطرمخة عليها.. ثم نذهب إلي ما هو أعجب والخاص بالمعد محمد ناقد.. مرة يقول انه مستشار بمجلس الوزراء ومرة يقول انه مستشار في صندوق "تحيا مصر" ومرة يقدم ورقة انه بوزارة العدل والجميع يعلم انه محام.. والأغرب انه يعمل في الاعداد بالقناة الثانية ويعني بالصلاة علي النبي التليفزيون بقي "سمك لبن وخروب وسوبيا وجمبري كمان" والأخ رئيس التليفزيون مش فاضي غير لزيادة جرعة الورنيش وهو لا يدري ايه المستخبي.. قنبلة ستنفجر وستطاير منها شظايا تحمل الكثير من الفضائح.. وهناك حاجة تجنن ان شخصا كتب أشياء علي النت لا يمكن لأي جهة معينة ان تقرأها وتسكت عليها.. وستر ربنا ان بقية قطاعات ماسبيرو "ماشي الحال" ومشاكلها بسيطة لأن قياداتها يعملون للصالح العام ومفيش واحد منهم حاطط عينه علي منصب أعلي!!
نذهب للفضائيات الخاصة ومذيعيها.. ونجد بعض المسخناتية هدأوا اللعب شوية لأن التيار والموجة تسير بقوة ناحية مصلحة البلد واستقرارها.. بينما هناك البعض يركب دماغه ومصمم يولعها ومش هايفلح لأنهم انفضحوا بما فيه الكفاية.. وكمان لأن البرلمان والحكومة "ايد واحدة" ضد أي محاولات لشق الصف الوطني!!