فور أن جلست أمام شاشة اللاب توب لأكتب مقالي الأسبوعي وجدته حاضرا أمامي بشحمه ولحمه، فركت عيني غير مصدق وأوشكت أن أجري صارخا غير أنه قال لي وهو يمسكني من ذراعي:
- مالك يا إتش اتخضيت كده ليه؟
- مش انت خلاص رحلت من الدنيا دي؟
- هههههههه قصدك مت أيوه وإيه المشكلة؟
- إيه المشكلة ازاي بس يا أستاذ فؤاد؟
- تمام يعني انت عارف ومتأكد أني فؤاد؟
- أيوه طبعا هو أنا ممكن أتوه عن فؤاد فواز استاذي وزميلي وأخويا الحبيب؟
- والله فيك الخير يا إتش يعني لسه فاكرني؟
- ياخبر هو انت تتنسي ياريس ده حتي سامح ابنك بيغيب ويطل علينا علشان نشم فيه ريحتك يا أستاذ.
- باقولك إيه سيبك من الرسميات وخلينا نتعامل زي ما كنا زمان يعني قولي يافؤش!
- أيوه يا ريس بس يعني!
- ولا بس ولا مابسش خلاص قولي يا فؤش بدال ماسيبك وأمشي!
- لا استني بس تمشي إزاي ثم انت جيت هنا إزاي أصلا؟
- هو انت يا إتش فاكر إنكم بس المسلمين اللي مش بتموتوا لما تندفنوا؟
- ههههههههه لا مش قصدي يا فؤش العمر الطويل ليك بس أصلك يعني معملتهاش قبل كده.. وحشتني جدا يا رجل ومفتقدك فوق ما تتصور.
- طمني يا إتش هو إيه اللي حصل ده؟
- اه فهمت الحادث بتاع الكنيسة هو إللي جابك علي ملا وشك؟
- أبدا أنا من زمان عايز أجيلك واسلم عليك بس الظروف منعتني!
- وانتوا كأموات سمعتوا برضه عن الحادث؟
- تاني أموات يا اتش يا بني بأقولك أنا عايش حتي لو جسدي اندفن تحت التراب.
- أيوه صح معلش سامحني!
- طبعا سمعنا عن الحادث ومخبيش عليك قلقت وقلت لنفسي مفيش غير حبيبك اتش يطمنك.
- اطمن يا فؤاد متقلقش وعلي فكرة المرة دي بالذات أنا مش قلقان لأن الضربة كانت للمسلمين قبل الأقباط.
- بس عدد الضحايا كبير يا إتش المرة دي
- يا فؤش الضحايا مش بس كانوا أقباط جوه الكنيسة لا الضحايا هم كل المصريين اللي العمل الجبان ده فزعهم، ده انا لسه كنت مع زملاء في مؤتمر بالاقصر من كام يوم وشوفنا حال السياحة عامل إزاي والناس هناك كانوا مستنيين الكريسماس علي أحر من الجمر علشان كان فيه حجوزات متخيل حادث زي ده ممكن يرجعنا كام سنة ورا؟
- خفت تكون فتنة حصلت.
- مانت عارف يا راجل، البلد دي طول عمرها ضد الفتنة فاكر يا فؤاد لما كنت تلاقيني بتوضا تقولي حرما؟
- أيوه وكنت تضحك وانا ازعقلك واقولك قولي جمعا ياجدع انت تصلي صلاتك وانا أصلي صلاتي.
- كانت أيام جميلة يافؤش، طب فاكر لما كنت تزعلقلي لو لقيتني مبلطج شوية ومش منتظم في الصلاة؟
- طبعا يا إتش لأنك طول ما انت بتصلي تبقي مسلم بتعرف ربنا يعني مش ممكن تأذي حد مختلف معاك في الديانة.
- طول ما فيه ناس زيك فاهمين الفهم ده يا فؤاد يبقي متخافش علي مصر.
- هههههههه بس ده ما يمنعش إنه فيه تفرقة بين المسلمين والمسحيين
- تفرقة إيه يا جدع ما كلنا في الهم شرق!
- طب بذمتك انا خدمت معاكم في الأخبار عمري كله عمرك شوفت اسمي في الفايزين بقرعة الحج؟
- ههههههههههه الله يحظك يا فؤاد عمرك ما حتتغير أبدا عموما يا سيدي أوعدك لو جاتلي القرعة السنة دي هاتنازلك عن الحج أو أحاول أشوفلك تأشيرة نطلع سوا.
- بجد يا إتش؟
- طبعا يا جدع هو انت نسيت كلامك.. انت تصلي صلاتك وانا أصلي صلاتي !