** لا يحتاج الرئيس السيسي أبدا الي من ينافقه لسببين من وجهة نظري.. الأول اننا نشاهد ونلتمس ما يفعله لأجل الشعب والبلد.. والثاني أنه فاهم كل حاجة ومحدش محسوب عليه في أي حتة. ومن هنا كلما تحدث الرئيس في أي مناسبة لابد أن يخاطب الشعب كعادته بكلمات صادقة تخرج من قلبه فتصل مباشرة الي آذان سامعيه.. ولكن هذه المرة كانت الكلمات عزيزة وخالصة لوجه الله فقد تجمعت دموعه في عينيه وهو يقول "نفسي أعمل كل حاجة حلوة للشعب الطيب ده.. شعب أصيل وكريم وتحمل.. عندما كان يفتتح تطوير شركة النصر للكيماويات الوسيطة وهي احدي القلاع الصناعية للقوات المسلحة "منجم الرجال" وقد توقفت أمام أشياء مهمة منها مدي شفافية الرئيس وهو يتحدث عن الأمن القومي وعن إحساسه بأن الشعب يتحمل لأنه عظيم وكيف يداعب بعض العاملين وكيف استقبل دعاء الدكتورة فايزة "خبيرة البيئة" له قائلة "ربنا يحبب فيك خلقه. ويوقفلك ولاد الحلال" وهي دعوات من القلب يحتاجها الرئيس بالفعل من المخلصين بجانب أنه يحتاج شيئا آخر مهماً وهو أن يعمل الشعب وينتج حتي تزداد العجلة سرعة.. وقولوا يارب.
ومن حق كل "اللي بيشوف" شغله عشان خاطر البلد اني أتكلم عنه.. وأقصد هنا إدارة الشئون المعنوية بقيادة اللواء محسن عبدالنبي التي لا تتواني في أي مناسبة وطنية عن انتاج وصناعة وتقديم فيلم تسجيلي عما يتم انجازه علي أرض الواقع وحدث ذلك خلال زيارة الكيماويات الوسيطة في شكل سينمائي وفني وإعلامي رائع وصورة مبهرة كدليل علي أن أي عمل تقوم به القوات المسلحة يتم بضمير وبحق وحقيقي.. مش زي مؤسسات مدنية كثيرة بتسلق أي حاجة..!!
وبعد الكلام اللي فات واعتقد أنه كويس نروح بقي للكلام اللي يسد النفس وأظن عرفتوا انه عند بعض وزراء الحكومة.. وعاوز واحد أو واحدة من الناس يقولي مين انتقد شغل الرئيس وكام مرة.. ومين انتقد الحكومة الميمونة كام مرة.. وماتعدش.. طبعا كل الناس بتصرخ وتلطم لأنها تشعر انه لا يعمل في الحكومة أكثر من خمسة أو ستة وزراء ووزيرات.. والباقي لا يفكرون ولا يخططون ولا ينزلون الشارع وسط الناس ولا ينفذون المشروعات القائمة.. وأعتقد أن الناس تنتظر بفارغ الصبر حكومة "كاملة" تعرف يعني إيه كلمة حكومة ويعني إيه شعب وبلد. وأهم حاجة تكون صاحبة قرار مش تحمل الرئيس عبء التفكير والمناقشة واصدار القرارات ثم متابعة التنفيذ.. يعني عاوزين حكومة بجد.. وكفايه قوي لحد كده.. كتر خيرهم..!!
** طارق نور: مش شماتة فيك.. لكن كل الناس اللي بتحب البلد زيك بالظبظ بتقولك "أحسن".. ولسه اللي جاي.. وخليك ماسك في ابراهيم عيسي عشان ينفعك..!!
** عشان تصدقوني لما قلت اكثر من مرة ان مرتضي منصور "دكر" وقدر وعرف يوقف شوية "ألتراس" عند حدودهم ومحدش منهم يقدر يهوب ناحية ميت عقبة من أساسه.. وتصدقوني لما قلت ان محمود طاهر بيخاف من الألتراس وركبه بتترعش منهم لدرجة انهم راحوا ضربوا اللاعبين بفرع مدينة نصر وشتموا النادي واللي عملوه كذا مرة وامبارح راحوا عند ستاد التتش ولولا الشرطة كانت حصلت كوارث ودماء وبلاوي سودا.. شفتم بقي مين الدكر ومين اللي "لا مؤاخذة".. وعلي فكرة محسوبكم أهلاوي حتي النخاع والثمالة وحتي الممات..!!