طالما أن المسيحيين مصريون وليهم في البلد مثل المسلمين بالظبط يبقي ليه الهيصه والزمبليطة دي كلها وإحنا عارفين إنه هايحصل أصعب من كده بعد ما الإخوان والطابور الخامس خدوا علي قفاهم في ثورة 30 يونية..!! .. بجد حاجة غريبة لأنه اللي بيمشي علي المسيحيين في مصر بيمشي علي المسلمين وياما مسلمين اتقتلوا عيني عينك في شوارع وبيوت شمال سيناء.. وكلنا عارفين إن اللي بيشهد علي أي إرهابي هناك بيتصفي في التو واللحظة مسلم بقي مسيحي مابتفرقش.. وماسمعناش قبل كده عن حد من المسلمين والمسيحيين ساب بيته واتنقل لمكان تاني .. الكل متمسك ببيته وشغله وحياته ومتوكل علي الله في موضوع الموت .. لكن عشان شمال سيناء فيها مجموعة من 6 أبريل والاشتراكيين الثوريين والطابور المعفن إياه بنشوف كل فترة حبة قلق وبيروحوا لحالهم عشان الناس هناك واعية قوي .. لكن واضح أن الخوف كان أكبر هذه المرة وبرضه الأزمة هاتمر بسلام والبلد مش هاينهزلها شعرة .. وهنا سوف أتمسك بشهادة د.عصام خليل رئيس حزب المصريين الأحرار مساء السبت الماضي في أحد البرامج المسائية بقناة صدي البلد المحترمة الوطنية وهو يقول علي الهواء¢ المسيحيين همه اللي سابوا بيوتهم وراحوا الإسماعيلية ومحدش قالهم إمشوا من بيوتكم¢.. وإيهاب رمزي المحامي قال في نفس البرنامج ¢ اتنقلوا مش اتهجروا¢ وناس معارف من العريش قالولي إن المسلمين بقوا يتحايلوا علي المسيحيين¢ 85 أسرة ¢ مايسيبوش بيوتهم وأشغالهم ويمنحوا الفرصة للإرهابيين يخوفوهم .. وماسمعوش الكلام.. يبقي بذمتكم ده شئ طبيعي وعادي.. !!.. ولما قلنا أهل سينا يتنقلوا مكان تاني لمدة ثلاثة شهور حفاظاً عليهم عشان الجيش ينضفها من الإرهابيين خرج علينا الكارهون وأصحاب الهوي واتهموننا بتهجيرهم.. ونسوا ان التهجير مباح ومطلوب وقت الحرب زي حرب 1967 مع أهل القناة.. يبقي محدش يرجع يقول كاني وماني ودكان الزلباني..!!
وبعد ماخلصنا من تسخين وتوليع إبراهيم عيسي بقناة القاهرة والناس .. لسه بينشر سمومه في جريدة يمولها الراعي الرسمي نجيب ساويرس الذي قام أيضاً بتمويل فيلم ¢ مولانا¢ المسئ للصحابة والدعاة ومنعته الإمارات والكويت ولبنان .. وكمان فيه كلام إنه هايتم تحويله لمسلسل بتمويل ساويرس ودي مصيبة سودا لأن إللي هاينتجه هايبقي ¢ ....¢ .. وكذلك هناك إتجاه لقيام ساويرس بتمويل إنتاج رواية "رحلة الدم .. القتلة الأوائل " تأليف ¢ لا إبراهيم .. ولا عيسي ¢ والتي تتضمن أن مصر كانت مهداً للصحابة الذين جاءوا إليها للتخطيط لجرائم قتل الخلفاء الراشدين والصحابة مثل سيدنا عثمان بن عفان وسيدنا علي بن أبي طالب رضي الله عنهما.. كما أن مجمع البحوث الإسلامية وصف الرواية بأنها تعتمد علي مصادر شيعية وتنتهج منهج نزع القداسة عن الصحابة والتابعين .. وهنا أتساءل ¢ هل لذلك علاقة وارتباط بتقديم إبراهيم عيسي من قبل لبرنامج إسمه ¢ الطريق إلي كربلاء ¢ بقناة شبابيك الشيعية البحرينية واشترطوا عليه في العقد إرتداء الزي الأسود حتي أستيك ساعة يده أسود - والفيديوهات موجودة علي اليوتيوب - إكتبوا "إبراهيم عيسي الطريق إلي كربلاء ".. وفي برنامج ديني جديد في رمضان الجاي تمويل ساويرس وهايتذاع بقناة ¢ON¢ وده لينا كلام فيه مع أبو هشيمة .. !!
ثم يكتب ¢ لاإبراهيم ولا عيسي ¢ منذ فترة مقالاً بعنوان ¢ بهلوانات النظام ¢ وفطست علي نفسي من الضحك لأن الأخ اللي بيتكلم علي التاريخ وعامل فيها المضطهد الأعظم والجبرتي الأوحدنسي تاريخه مع نظام مبارك ونفتكر منه شوية صغننين.. فمازال يقدم برنامجاً إذاعياً بمحطة ¢نغم¢.. وتمت دعوته وأسرته سفر وإقامة لحضور مباراة السوبر الماضية في أبوظبي..ونسي انه تم تعيينه في روزاليوسف بتوصية من الله يرحمه اللواء رءوف خيرت ¢ أمن الدولة¢ .. ونسيت ان العفو الرئاسي عن سجنك كان من الرئيس مبارك ¢ ربنا يعافي عنه¢ بعد تليفون من صديقك زكريا عزمي واللي حدد لك ميعاد ساعتها مع حبيب العادلي وزير الداخلية .. كما كنت إحدي أدوات جمال مبارك وتتلقي منه التعليمات عن طريق أحد كوادر الحزب الوطني اللي عملك العلاج المجاني في مستشفياته وجابلك 50% تخفيض في كمباوند الورود .. ولما أعلن الراحل عمر بيه سليمان ترشيحه للرئاسة سارعت وأعلنت أنك منسق حملته "عمر سليمان رئيساً ".. وكل ده يامفتري وتكتب عن بهلوانات النظام.. طب إنت تبقي إيه ..!!
وأختم بالطلب الذي قدمه "عيسي" لهيئة الاستثمار لتأسيس شركة الكرما للصحافة والطباعة والنشر ومديرها سيف الله محمد سلماوي وهو مدير الفرع القطري لدار نشر ¢بلومز بيري¢ الإنجليزية وشريكاه في الشركة هي القطرية نوف أمير عبدالعزيز. وأحمد إبراهيم الزيادي الذي أجري حوارات عام 2009 في مجلة ¢وجهات نظر¢ مع المرشد العام للإخوان مهدي عاكف..!!
وآخر المتمة تكتب بكل بجاحة في نشرتك ¢8صفحات ¢ بفلوس المفصول من حزب المصريين الأحرار ساويرس أول إمبارح " عار تهجير الأقباط من سيناء.. وتكتب إنهم لاجئين بالإسماعيلية.. وإن سيناء بقت سوريا والعراق" وكل ده وتقول مضطهد .. حسبنا الله ونعم الوكيل في اللي بتعمله في البلد اللي عملتك بني آدم..!!
** مازال مدحت العدل مصمما علي العبث بدموعنا وعواطفنا.. أعاد شجون ذكريات الطفولة والصبا والشباب في حي شبرا مع ديوانه الجديد "شبرا مصر".. كان حفل التوقيع في منتهي الشياكة واجتمع فيه الحبايب والصحاب بالهناجر.. وكل قصيدة والأخري تحملنا للحنين للماضي.. وبرضه بكيت والجميع لما قال قصيدة راجل العدلية بجد سامي العدل الله يرحمه.
** الحسنة الوحيدة بقناة ¢ On sport ¢ هو برنامج ¢القاهرة أبوظبي¢ للمذيع الإماراتي المتألق يعقوب السعدي الذي نجح في إخراج المعشوق محمود الخطيب للشاشة وإمتاعنا به .. وشوفوا الخطيب وأدبه لايكلم يعقوب إلا بلقب أستاذ ولكن قبله بيومين طلع معاه واحد يقوله ¢ يعقوب حاف¢ وفعلاً هناك فرق في الأدب والتربية.. ونورت مصر ياكابتن يعقوب.
** خيري رمضان.. إضافة إعلامية وطنية مهمة جداً لقناة النهار التي تنهار منذ فترة لوجود أمثال ريهام سعيد وغيرها.. أنا واثق أنك ستعيد مافقدته من جمهور.. ووجودك إحدي حسنات ¢ الكحكية¢..!!
** المذيعة مي حلمي.. فعلاً ¢ A one ¢ قناة النهار رياضة..!!
** بيومي فؤاد .. أتقل دم في مصر.. الحظ لما يآتي يخلي الأعمي ساعاتي..!!
** اللهم لا شماتة.. ربنا عاقب الإخواني الهارب في قطر "أبوتريكة" علي ما فعله ضد البلد بأن حرمه من دفن المرحوم والده.. ولا أدري سبب الإهتمام الاعلامي بالجنازة.. نسيتم الإرهابي "أبوتريكة"..!!