بالذمة ده اسمه كلام...!!
المصريون جميعا يباتوا ويصحوا وكل شغلهم الشاغل وسؤالهم اليومي (هو الدولار بكام)؟؟
الفقير والغني.. اللي معاه دولار واللي معاهوش.. ولا اللي عمره ما شافه!!
كله مهتم أوي وبيسأل بكام النهارده؟ والناس تراقب وتتوقع.. ده طلع.. لأ ده بينزل.. بيقولوا بيهبط.. لا بيقولوا هايضرب لفوق.. يا مثبت العقل في النفوخ يارب!! الناس قربت تتجنن والله!
لكن يا تري ايه اللي عمل فيهم كده؟؟
السبب طبعا معروف إن اﻷسعار لما ضربت في العلالي.. الكل لزقها في الدولار.
العربيات غليت.. قالك أصل الدولار ارتفع!!
الأجهزة غليت.. أصل الدولار طلع!!
طب أسعار اللحمة والخضار ولعت..برضه لزقوها في الدولار !!
والناس قاعدين لا علي حامي ولا علي بارد مستنيين الحاج دولار ينخفض!!
ومن جانبي..
أحب أقولكم إن الدولار ليس هو نصير المستضعفين في الأرض.. ولو نزل سعره للنص عمر الأسعار ما هاترجع تاني زي زمان ولو بقي الدولار بجنيه!!
ليه بقي؟؟.. لأن الأسعار زادت علشان حاجات كتير أوي غير الدولار.. منها الجمارك اللي زادت علي كل السلع تقريبا!!
والأسعار زادت لما ارتفع سعر البنزين.. والكهرباء والغاز.. والميه.
الأسعار زادت لما طبقوا علينا ضريبة القيمة المضافة.
فيا أيها الناس.. سيبوا الدولار في حاله فارتفاع سعر الدولار بريء من دم ارتفاع الأسعار!!
وسيبوا البنوك تتسابق مع تجار السوق السوداء والمضاربين.. وادعوا ألا يبتلينا الله بموجة غلاء جديدة لأي سبب جديد.