< شوووفت يا عم.. مش قلتلك قبل كده.. إن الميه ماتطلعش فى العالى أبداً.. أهى المحكمة «برأت» مبارك.. من تهمة قتل الشهدا!!
- شهداااا.. مين يا عم!!
< يا عم الشهداااا.. بتوع يناير.. اللى ماتواااا.. فى أحداث يناير.. بتوع حمادة هلال يا جدع!!
- يااااه.. هوه يناير ده فيه ناس ماتت يعنى؟!
< أووووه.. دى أمم ماتت يا عم.. انت شارب حاجة.. وﻻ إييييه؟!
< طب ودول مين قتلهم بالظبط؟!
- الناس بتقول مبارك.. بس المحكمة بتقول ماقتلش حد!!
- يبقى «مبارك» علينا البراءة كلنا يا عم.. هو إحنا هنعرف أكتر م المحكمة؟!
< طب والناس اللى ماتت دي.. ملهاش حق.. ودمها هيروح هدر؟!
- يا عم فكك منى.. دول ليهم ربنا.. وزمان ناسنا قالوا فى الأمثال: الحى أبقى من الميت.. سيبك من عقدك دى.. وتعالى نهنى «الريس» بتاعنا بالبراءة!!
< يخرب بيتك يا بعيد.. هتودينا فى داهية.. هو خلاص مابقاش ريس دلوقتى!!
- طب ليه.. مش بتقول.. إنهم طلعوه براءة.. وصاغ سليم.. وخرج م القضية زى الشعرة م العجين.. يبقى المفروض يرجعوه ريس تانى.. زى كل ما رجالته رجعت الحكم تانى.. اشمعنا هوه يعنى.. يكونش مبارك ابن البطة السودة؟!
< وإيه تانى يا عم.. كمل حكمك.. مانت النهارده بقك بينقط درر!!
- وكمان لازم.. وحتماً.. ولابد.. كلنا نبوس راسه.. ونقوله سمااااح وآسفين يا ريس.. وحقك علينا.. معلهش إحنا طلعنا جزم قديمة.. واتبطرنا ع النعمة اللى كنا فيها.. وقلينا أدبنا عليك.. وعلى عيالك الأمرا دووول.. والست الكمل دى.. مراتك سوسو هانم!!
< بص أنا ليا سؤال أخير عندك.. انت مبلبع حاجة دلوقتى؟!
< لا يا عم.. ده كله شريط واحد ترامادول.. بلبعته ع الريق!!
< طب أبوس إيدك.. شوف لى شريط زيه.. عشان أنسى.. وآخد البنسة!!

خلاصة الكلام:
سد النهضة.. وسؤال غير برىء!!
< بعد سجن الوزير.. محمد نصر علام وزير الرى السابق.. أسدل الستار تماماً.. على أى حديث حول كارثة سد النهضة!!
< فهل كان الهدف «إخراس» هذا الصوت الوطنى.. الذى كان سد النهضة شغله الشاغل.. وكان دائماً ما يكشف لنا كوارث وعورات التهاون المصرى فى التفاوض مع إثيوبيا.. حول هذه الكارثة التى باتت تهدد الأمن القومى المصرى؟!!