كل مرافق الدولة تخضع لاهتمام ومتابعة من الرئيس السيسي بصفة مستمرة.. وآخر اجتماع أول أمس خير دليل علي كلامي.. بتعليماته حول وسائل النقل.. ولا انكر أن هناك مسئولين - خاصة من أعضاء الحكومة - شايفين شغلهم بضمير وهؤلاء للأسف قليلون جداً.. ولأن هشام عرفات وزير النقل مافاتش علي تعيينه 45 يوماً يبقي مالوش ذنب في اللي هاكتبه ده ولكنه مطالب خلال ثلاثة شهور بتعديله.. ويتحمل المسئولية عما سأقوله وزراء النقل السابقون اللي كانوا بيخدعوا الجميع ببيانات مضروبة وعاصرهم رئيس هيئة السكة الحديد مدحت شوشة.. وهنا أخص قطارات السكة الحديد العادية مش المكيفة ولا الأسباني والفرنساوي.. وفي البداية أدعو المهندس شريف إسماعيل رئيس الوزراء لأن يتخفي خلف نظارة سوداء ويدخل محطة مصر بالقاهرة ويتجه إلي رصيف¢20¢ ويركب قطار ¢الغلابة والفقراء¢ في العاشرة و10 دقائق صباحاً والمتجه للإسكندرية.. يانهار مالوش شمس.. مصيبة سودة.. كراسي تقطم الوسط وتجيب تصلب في الغضاريف.. شبابيك مكسرة في عز الشتاء والصيف.. أرضيات في منتهي القذارة.. تدخين جميع أنواع السجاير الفاضية والمليانة.. السريحة بيبيعوا كل حاجة وشكل معظمهم استغفر الله العظيم مسجل خطر.. وغير كده كتير.. والحسنة الوحيدة هم الكمسارية والمفتشون في منتهي الطيابة وطبعاً لأنهم حاسين بالغلابة اللي راكبين ومش عاوزين يزودوا حياتهم طين وكآبة وغم.. كفاية عذاب القطر.. وطبعاً في قطارات كتير بنفس الشكل المقرف ده واللي المفروض يخصصوها للمواشي مع الاعتذار للمواشي لأن عربات قطارات البضاعة المخصصة للمواشي أنضف ميتين مرة من قطار ¢ عشرة وعشرة صباحاً ¢ واللي زيه.. وهنا أتحدي أن يكون ¢شوشة¢ باشا ركب القطر ده.. والمصحف ما يستحمل الريحة دقيقة واحدة وهايغمي عليه.. وإذا فكر بعد كلامي ده يركب القطار لوحده من غير زمبليطة وحاشية يبقي قدامه حاجة من اتنين.. يا إما يشوف بنفسه من غير أونطة ويصلح الدنيا أو يستقيل حزناً علي حال الركاب وساعتها هانحترمه جدا في الحالتين.. وعشان الحكاية تكمل.. يوم السبت الماضي دخل شخص محطة قطار طنطا الساعة تلاتة ونص عصراً وسأل موظف الشباك ¢ قطار القاهرة الساعة كام.. قاله عشرة بالليل.. سأله طيب أول قطار دلوقتي.. قاله أربعة وتلت.. طلب منه يقطعله نص تذكرة ودفع عشرين جنيهاً وطلع قعد علي رصيف خمسة لمدة ساعة ليكتشف أن التذكرة اللي معاه للقطار رقم ¢915¢ المتجه للإسكندرية وفات خلاص.. فتوجه للموظف الذي ثار في وش الشخص الذي صعد لناظر المحطة الذي صدقه لأن نفس المشكلة تكررت مع نفس القطار وطلب من الشخص التوجه لشرطة المحطة واستقبله العقيد ياسر عبدالحميد بترحاب واحترام وطلب من الشخص تحرير محضر ولكن الشخص وجد نفسه هايقعد للساعة عشرة بالليل.. خد بعضه ورجع في ميكروباص.. وتذكرته بتاعة القطار معايا أنا لو ¢شوشة¢ بيه عاوزها ويتأكد من العقيد المحترم ¢ياسر¢ أبعتها له.. كده خلصت كلامي.. وهاستني مين هايهتم ويسأل..!!
** تلقيت ردود فعل رائعة حول ما كتبته هنا الأسبوع الماضي عن علاقة المذيع يوسف الحسيني مع إسرائيل عن طريق ¢نسيبه¢ عازف العود الاسرائيلي خالد إلياس حنا جبران.. ومنذ السبت الماضي وحتي كتابة هذه السطور تلقيت تساؤلات في دهشة شديدة "هو أبوهشيمة اللي المفروض إنه وطني وبيقدم مشروعات للبلد سايب الحسيني في القناة لحد دلوقتي ليه.. حد ضاغط عليه بحاجة معينة.. طيب.. لما يبقي جوز اخته اسرائيلي.. يبقي إيه.. إيه يعني ده.. ومين المفروض يشوف الحكاية دي..!!".. وطالبني العديد من القراء... بكشف المذيع المطرود من قناة ¢ oN¢ واشمعني أبوهشيمة ماعملش كده مع الحسيني.. وبصراحة ما صدقت أطلع اللي عندي.. خالد حفناوي أحمد تليمة وشهرته خالد تليمة من أوسيم أرياف الجيزة معاه بكالوريوس تجارة وبدأ يشتغل صحفي من خلال جماعة الإخوان الإرهابية المحظورة كمدير تحريرللموقع الإليكتروني للجنة الدفاع عن سجناء الرأي ويرأسه الصحفي محمد عبدالقدوس رئيس لجنة الحريات بنقابة الصحفيين سابقاً.. وتليمة الصديق الأنتيم للإخواني مصطفي النجار والمسجون أحمد دومة بتاع الإخوان رسمي نظمي فهمي واللي ولع المجمع العلمي باعترافه.. وكذلك المدعو احمد ماهر بتاع ستة أبليس والموضوع تحت المراقبة.. وكان تليمة عضو الأمانة العامة لحزب التجمع مدفوعاً من جماعة الإخوان لاختراق الأحزاب اليسارية.. وهو أحد أشهر أعضاء جماعة ¢ عاصري الليمون ¢ والمروج لها علناً.. والصديق المقرب من إسراء عبدالفتاح الممنوعة من السفر والمتدربة النشيطة في الخارج علي تنظيم مظاهرات قلب نظام الحكم سلمياً ويلتقيان في كافيه أوسكار بالمهندسين.. ومعظم الليالي تجده مع يوسف الحسيني وناصر عبدالحميد في مطعم وحديقة وبار الجريون بوسط القاهرة.. وكم كتبت عن تصرفات تليمة مع زميلاته خاصة نهاوند سري التي كانت ترفض اراءه وكلامه علي الهواء إلي أن خلصها الله منه بعد أن قرفها في عيشتها بادعاء الديمقراطية وبث سمومه علي الناس.. وكان يقدم برنامجاً اسمه ¢أهل مصر¢ بقناة الميادين التابعة لحزب الله والممولة من إيران عيني عينك.. والمفاجأة الكبري أنه متهم في قضية التبديد رقم ¢ 460 ¢ لسنة 2012 جنح أوسيم وصدر ضده حكم بالحبس.. والآن عرفتم مين العيال اللي ضحكوا عليكم وقالوا ثورة وهجايص.. ولسه في كتير هانفضحهم.. لحد الشاشات ماتنضف..!!
** لما حد يحب يرشح نفسه لمجلس نقابة الصحفيين لازم يحترم عقولنا وإن عندنا مصادرنا وبنعرف فسادهم وادعاءاتهم الكدابة.. وأي مرشح حط إيده مع الإخوان الإرهابيين والسلفيين والاشتراكيين البدنجانيين هايسقط بالتلاتة..!!
** كارثة فساد في ماسبيرو.. سيتم تطبيق نظام صرف المرتبات بالفيزا كارت من البنك.. ولما البنك طلب المسميات الوظيفية التي تم التعيين عليها لم يتم عمل أذونات الصرف لأنه تم اكتشاف أكثر من 450 شخصا ما بين متوفين ومسافرين للخارج ويتم صرف مرتباتهم طوال السنوات الماضية وعرفوا كانت بتدخل جيوب مين في التليفزيون.. وكذلك وجود مخرجين ومذيعين ومعدين ومديري عموم كانوا سعاة وسكرتارية..!!.. بالذمة مفيش جهة جدعة تشوفلنا الكلام ده حكايته إيه وتحبس الحرامية والفاسدين..!!
** "القاهرة أبوظبي" أصبح البرنامج الرياضي الأول في العالم العربي لأن مقدمه الإماراتي يعقوب السعدي كاريزما ومثقف ومحترف كما أنه يمتعنا بالخطيب معشوق المصريين رغم أنف مدحت شلبي.. ولكن أنصح يعقوب بأن مشاهدة البرنامج تتأثر لمستوي ضعيف عندما يظهر خالد بيومي الذي يتكلم وكأنه الأوحد العالم والمحلل الأوحد في الكون وهو مجرد ناقل من أي مكان.. وللأسف ذنبه إيه حازم إمام صاحب الشعبية الجارفة إنه يضطر لظهوره مع ¢بيومي¢ في فقرة واحدة.. ويا يعقوب.. بلاها خالد بيومي.. عندك خبراء كتير والناس بتحبهم..!!
** واحد نازل تلميع في رئيس النادي الكبير في العالم العربي لآنه بيسترزق منه بالعبيط.. وبيخبط في كابتن كبير جدا الجماهير عاوزاه رئيساً للنادي والتخبيط لأن النجم مش هايدفع للأخ إياه.. عرفتوه..!!