هاه، مين من حضراتكم ممكن يتوقع الحلقة اللى جاية أحداثها إيه أو مين هيكون البطل فيها؟ إيه؟ مش فاهمين؟ غريبة، أنا توقعت إن الدنيا كلها متابعة الحلقات المنفصلة المتصلة اللى بنعيشها اليومين دول، طيب أنا كده هضطر أحكى لحضراتكم الكام حلقة اللى فاتوا.

الحلقة الأولى: دى كانت بطولة حمار، آه والله، والحكاية إن فى يوم قرر حمار اختراق ثغرة أمنية فى مطار القاهرة الدولى، إلى أن وصل أمام صالة السفر، تضاربت الأقاويل، وزادت التساؤلات، وتم القبض على الحمار والتحفظ عليه واستجوابه، ولكن من الواضح أنه لم يتكلم حتى الآن، عموماً ما زال التحقيق مستمراً، وما زلنا فى انتظار اعتراف الحمار.

الحلقة الثانية: لظروف إنتاجية، ونظراً لأن الجهة المنتجة كانت مأجّرة المطار مدة طويلة، فقرروا الاستفادة من المكان قدر المستطاع، ولكن هذه المرة تم تغيير البطل فكانت البطولة نسائية وفيديو مسرب على الإنترنت لسيدة تسب وتلعن من داخل صالة السفر وتتعدى على الضابط المسئول داخل المطار بالسب والضرب على كتفيه أمام الأعداد التى تجمعت حولها لمشاهدة ما يحدث. وبعد ذلك مباشرةً، تضاربت الأقاويل وزادت التساؤلات، خصوصاً أن بعض الناس قالوا إن السيدة لم يُقبض عليها وباقى الناس قالوا إنها رهن التحقيقات، وفى النهاية تم الإعلان عن القبض عليها رسمياً، ومن ناحية أخرى، وبالسؤال عن بطل الحلقة الأولى واعترافاته، فهو لم ينطق بعد، وما زلنا فى انتظار اعتراف الحمار.

الحلقة الثالثة: من بطولة أبوتريكة، نجم النادى الأهلى والمنتخب الوطنى اللى طلع عليه كلام كتير قوى، فى بدايته قالوا: «خلوق ومهذب ومصلى وفى حاله»، ثم مع بداية ظهور الإخوان الحلوين قالوا: «ده معاهم وكان يؤيد الأحزاب الإخوانية اللطيفة»، وبعد سقوطهم قالوا إنه يدعمهم بالمال وأشياء أخرى كثيرة، وخصوصاً أيام رابعة، كل الكلام ده عدى وخلص على إنه إشاعات أو أى كلام. وفجأة، وبعد اعتزاله، يتم اتهامه والقبض عليه بتهمة الانتماء للإخوان. ومع أن الكلام ده كان بيتقال من زمان، لكن، وبعد هذا الاتهام تضاربت الأقاويل، وزادت التساؤلات، وقالوا: تم القبض عليه، ثم قالوا: لأ لسه، وما زال الموضوع لم يتحدد إذا كان أبوتريكة فى بيتهم ولا اتقبض عليه، ولم يتحدد أيضاً إذا كان معانا ولا مع الإخوان الحلوين، عموما نتمنى له حظاً سعيداً وننتقل للحلقة التالية.

الحلقة الرابعة: فيديو جديد ومسرب برضه، ولكن هذه المرة لفنانة مصرية وأخرى تونسية تم تصويرهما من إحدى السيدات الإماراتيات وهما فى وضع مخل، تخيلوا حضراتكم لما فنانتين المفروض إنهم قدوة يتصوروا وهما بيعملوا شوبينج، أنا بجد مش متخيل، شىء مخجل فعلاً والسيدة اللى صورتهم واجهتهم بده وصورتهم ونزلتها على الإنترنت عشان الناس كلها تشوف الفضيحة، ليه كده يا عبير إنت وفريال؟ تعملوا شوبينج؟ طبعاً أنا باتّريق على الموقف اللى مالوش أى لازمة من سيدة إماراتية لا تمثل إلا نفسها، وعقب هذا الموقف مباشرة ً تضاربت الأقاويل وزادت التساؤلات عن سبب هذا الموقف المريب، ولكن سرعان ما ظهر المسئولون الإماراتيون المحترمون وبدأوا فى الإجراءات اللازمة تجاه تلك السيدة واعتذروا للفنانتين، ما تقلقوش حضراتكم أنا مش ناسى قضية الحمار، بس لسه ما نطقش.

الحلقة الخامسة: بطولة رئيس أحد الأحزاب العريقة فى مصر وتتلخص فى تسريبات تليفونية له عن آرائه فى بعض السياسيين وعلاقته بالإخوان، وغير ذلك، ومن ساعتها طبعاً حضراتكم عارفين، تضاربت الأقاويل وزادت التساؤلات عن سبب هذه التسريبات واشمعنى دلوقتى؟ ولكن ستبقى إجابة السؤال عالقة لأن الحلقة لسه بادية، وماحدش فاهم حاجة.

الحلقات دى وغيرها كتير زى حلقة وزير العدل مثلاً أنا مش معترض عليها، خصوصاً لو كان فيه حد وراها فاهم هو بيعمل إيه وبيشغل الرأى العام إزاى، لكن أنا اللى خايف منه إن الحلقات دى تكون من وحى الخيال ومالهاش مؤلف ولا مخرج ولا حتى منتج يوجهها.

بالنسبه لقضية الحمار، فقد تم الإفراج عنه بعد التأكد من عدم قدرته على الكلام لأنه حمار.