سمعت هذه الحكاية ، مواطن مربى حمار ، استيقظ من نومه فوجد حماره ميتا ، ولكي يعرف سبب وفاته ،اخذه الى الطبيب البيطرى ، ففاجئه البيطرى بأن الحمار مات بالجلطة.
فتفاجأ الرجل من قول الطبيب ، ولف وجهه للحمار ، ومسك رأسه وأخذ يكلمه بتعجب وحرقه واستغراب ، جاتلك جلطه ليه ؟ قصرت معاك في البرسيم؟ خريج هندسه ومش ﻻقي شغل ؟ خريج تجاره انجليزى وواقف فى سوق الخضار ؟ خريج أداب وبتسوق تاكسى ؟ خريج حقوق وبتشتغل سمسار ؟ خريج زراعه وجالك تعيين فى الطرق والكبارى ؟ جمعت كل اللى تملكه وأعطيته لإبنك علشان يسافر أوروبا وغرق على شواطئ اليونان ؟ مديون ومش عارف تسدد ديونك ؟ بتستنى دورك فى التعيين بقالك 10 سنين ؟ رحت ترخص الكيا ولقيت عليها مخالفات رغم انك جايبها زيرو ؟ مش قادر تشتري ملابس لولادك ؟ مش لاقى شقه ؟ قولي ... جالك جلطه ليه؟ واخذ قرض ومتورط بالسداد؟ الدنيا ملخبطه حواليك ومخك بطل يجمع من كثر القوانين الجائرة ؟ جتلك فاتورة كهرباء وما قدرتش تسدد ففصلوا عنك الكهرباء ؟ رفع اﻻسعار مش عاجبك ؟ شاعر انه في ثروات ومش مستفيد منها ؟ جالك جلطه ليه ؟ طلعت علي المعاش ومعاشك مش مكفي أيجار بيتك ؟ جالك فشل كلوى من المياه الملوثه ورحت تغسل قالولك ما فيش مكان إنتظر لما حد يموت وأدخل مكانه؟ بتتفرج على الفضائيات وبرامج التوك شو السطحية ؟ ممكن أعرف جاتلك جلطه ليه ؟ نفسك فى السمك والكيلو وصل 50 جنيه ؟ روحت تشترى لحمه لقيت الكيلو بـ 120 جنيه ؟ جيت تشترى أرز ولقيت الكيلو 10جنيه ؟ روحت تجيب التموين وقالولك ما فيش إلا جبنه دومتى ؟ ممكن اعرف جالك جلطه ليه!!!! جالك فاتورة غاز ب 150 جنيه ؟ جالك فاتورة مياه ب 200 جنيه ؟ مركب خط نت ب 140 جنيه والنت ما بيجيش ... وضعيف؟ المشمش نزل السوق وخلص وانت ما سمعتش عنه ؟ نفسك فى التين ومش قادر تشتريه ؟ ممكن أعرف جالك جلطه ليه !!! تعليمكم فاشل ؟ ممكن أعرف جالك جلطه ليه ؟ ممكن أعرف جالك جلطه ليه ؟ عايز تقولى إنك بتحس عننا ؟ ......... روح الله يسامحك
وبعد الحكاية لم انطق بكلمة واحدة حيث وجدت نفسى فى كل سؤال بالحكاية ،وارتفع ضغط الدم وخفت من الجلطة فقلت لنفسى قلبت علينا المواجع يامواطن انت وحمارك .......روح الله يسامحك.....الله يسامحك